Latgolys Radejis zinis (11.03.2008.)
Zylupis dzeivuotuoji suokuši parokstu vuokšonu aizdūmuos par saisteibu ar vierīneigū Latgolys kontrobandys lītu turamuo Zylupis nūvoda dūmis prīkšsādātuoja Oļega Agafonova atbolstam. Pret tīsys aizlīgumu iz izmekliešonys laiku Agafonovam piļdeit pošvaļdeibys vadeituoja pīnuokumus pasarakstejuš apmāram 70% Zylupis dzeivuotuoju.Šudiņ Rēzeknis dūmē gastei Eiropys Savīneibys i Krīvejis Transporta diologa Logistikys dorba grupys puorstuovji, kab ar Rēzeknis dūmis i Rēzeknis Specialuos ekonomiskuos zonys vadeibu puorrunuotu tranzita i logistikys i atteisteibys vaicuojumus. Paradzāts, ka pīsadaleis vaira kai 20 dalinīki nu Krīvejis Federacejis Transporta ministrejis, Eiropys Komisejis i īinterasātajom ES daleibvalstim. Sēdē planavuots apsameit ar informaceju par rūbežškārsuošonys vaicuojumim, apsprīst prīkšlykumus par Zīmeļu dimensejis transporta i logistikys partnereibu i cytus vaicuojumus.
Rēzeknis tīsa šudiņ planavoj turpynuot skateit kriminallītu, kuramā par 18 godus vaca jaunīša nuovejūšu nūtrīkšonu, braucūt alkohola reibumā, apsyudzāts bejušais Balvu rajona Policejis puorvaļdis policists Aigars Pužulis. Latgolys Radeja jau ziņova, ka 2006.goda 22.martā Balvu Kriminalpolicejis inspektors A.Pužulis alkohola reibumā izbrauce 18 godus vacajam Artūram Štoknim, kurais vāluok slimineicā myra. Policejis darbinīki asūt cantušīs slēpt A.Pužuļa vaini i mieginuo vyltuot juo ašņa analizis.
Šudiņ sešūs Rēzeknis piļsātys kultūrys nomā nūtiks vaļsts kamerorkestra “Sinfonietta Rīga” i dzigu grupys “Dzirnas” koncerts. Koncerta apmaklātuojim tiks pīduovuots franču baroka lelmeistara Žana Filipa Ramo operas “Dardans” fragmentu koncertuzvadums, kuramā myusdīnu dzigu ar baroka elementim izdzeivuos dzigu grupa “Dzirnas” pamatsastuovs.
Šudiņ Īpašu uzdavaumu ministra elektroniskuos puorvaļdis lītuos sekretariats, turpynojūt izgleitojūšu seminaru cyklu školānim par drūšu interneta lītuošonu, Preiļu Vaļsts gimnazejā reikoj debašu stuņdis “Internets – draugs vai ienaidnieks?”. Bet reit, 12.martā, par drūšu interneta lītuošonu tiks diskutāts arī Ludzys rajona Kuorsovys vydusskūlā.
Šudiņ Balvu rajona padūmis sēdē planavuots lemt par Balvu rajona pošvaļdeibys aģentūrys “Balvu slimnīca” moksys pakalpuojumu cenruoža apstyprynuošonu.
