Latgolys Radejis zinis (6.03.2008.)
Šudiņ plkst.11.00 Rēzeknis slimineicā nūtiks Atvārtūs durovu dīna izgleiteibys īstuožu audzieknim. Kai pastuosteja Rēzeknis slimineicas golvonais orsts Jezups Korsaks, jaunīši tiks īpazeistynuoti ar slimineicys nūdaļu dorbu gon teoretiski, gon ekskursejis veidā. Pārn Rēzeknis slimineicu Atvārtūs durovu dīnā apmeklieja aptuveni 40 jaunīšu, 2006.godā – aptuveni 20. Planuots, ka šūgod daleibu tymā jims ari Reigys Stradeņa Universitatis rektors profesors Juoņs Gardovskis. Ituos dīnys nūzarysynuos ar mierki īintereseit jaunīšus studēt medicynu i izzynuot ituo dorba specifiku.Šudiņ Jākubpilī, Nākotnes ielā 2, durovys viers puortykys veikals “Elvi” i “Elvi Kafe”. Leidz ar jaunū tierznīceibys centru durovys viers ari vairuoki cyti veikali, kas pierciejim pīduovuos gon apgierbus, opovus, bižutreju, apakšveļu, juvelirizstruoduojumus, gon ikdīnā nūdereigys precis – pučis, mobilūs teleponus, gruomotys, gon aptekys i bankys pakolpuojumus. Jaunuo tierznīceibys centra atvieršona nūdrūšynuos ap 100 jaunu dorba vītu.
Šudiņ Rēzeknis rajona padūmē nūtiks “Austrumlatgolys regiona graudu audzeituoju konference”. Konferencis atkluošona ar Rēzeknis rajona padūmis prīkšsādātuoja Monvīda Švarca i gostu uzrunu planuota plkst.10.30. Piec konferencis atkluošonys kluotasūšīm tiks prezeņteits Zemkūpeibys ministrejis projekts “Tehnologiskī rysynuojumi graudkūpeibys nūzaris atteisteibai Latvejā” i AS “Rēzeknis dziernavnīks” generaldirektora vītnīks Aivars Tjarve snīgs graudkūpeibys situacejis raksturuojumu Austrumlatvejis reģionā.
Šudiņ i reit, 7.martā, Davgavpils Medicynys koledžys telpuos projekta “Motivacejis programma Latgolys regiona jaunīšu integracejai dorba tiergā” laikā nūtiks Latgolys jaunīšu konfereņce “Latgolys jauņīši var i dora!”. Konfereņcis daleibnīki tiks informāti par projekta nūrisi, īpazeistynuoti ar Latgolys jaunīšu sabīdriskom organizacejom, diskuteis par lauku jaunīšim svareigom tēmom – dorba mekleišonu, sabīdriskom organizacejom i projektim, socialīm i gimenis uzlobuošonys, kai arī pošvaļdeibu lūmu jaunīšu dzeivē. Konferencē pīzadalēs jaunīši nu Bolvim, Ludzys, Rēzeknis, Preilim, Kruoslovys i Davgavpils, puorstuovi nu pošvaldeibys, navalstiskom organizacejom, izgleiteibys i vaļsts īstuodem.
