Ite poš viers zemis i piec 100 godim. Dabasu Durovys.

Trupynūt interveit latgalīšu muzyķus, itymā reizē skaitit interveji ar grupys “Dabasu Durovys” solistu Arni!

Īsapazeisam – kai jius kotru sauc, kaidys īsaukys i kū dorat grupā?
Nu vasali! 🙂 Grupys sastuovs: Sergejs (basģitara), Arnis (ģitara, bolss, mutis garmaņa), Juoņs (bungys i cyti sytamī inst.), Vitaliks (ģitara) i Egils (saksafons, bolss, tamburins). Sakarā ar tū, ka kotrs nu myusim cīteigi struodoj maizis dorbūs, bīžai goduos praseit paleidzeibu draugim (Māris, Kristaps Uģis) lai izpaleidz, ja kaids nu pamatsostuova nateik uz koncertim.

Ar kū jius nūsadorbojit ikdīnā – jiusu profesejis?
Es asmu dj Latgolys radejā i viesturis školuotuojs. Sergis ir TV cylvāks, Vitaliks jurists/muitnīks, Egils muzykys školuotuojs, Juoņs – ķīmikis organiskuos sintezis institutā.

Kai jiusim roduos dūma, ka juodybynoj grupa, kod i kai tys nūtyka?
Dūma kai jau dūma: Spieļāsim muzyku? Spieļāsim! 🙂 A puorejīs beja tikai laika vaicuojums. Lai nu kai, grupa dybynuota pyrms 2,5 godim.

Kai jius nūdefineitu tū stilu, kaidā spielejot?
Hmm, as slīcūs dūmuot ka tys ir roks… ka gribātu precizeit tīši kaids, tod saītu garš nūsaukums . Lai palīk Vīnkuorši Roks.

Kai roduos itys naparostīs nūsaukums “Dabasu Durovys” – pyrmīs kas skrīn pruotā – koč kaida saisteiba ar dabasu valsteibys lītom – paskaidrojit kaida tam ir nūzeime?
Ideju par nūsaukumu myusim deve Anna Briška. Jei beja puortulkuojuse Boba Dilana dzīsmi latgaliski. Knocking on heavens doors tapa par Dabasu Durovys. itymā sakarā gribātu īspraust kaidu pastuostu: Vīnu reizi staiguodams, kaids ceļaveirs īraudzeja vīnā vītā garu trepi da pošu dabasu. Vot jis dūmoj, vajag jam leist iz dabasim un parunuot ar pošu Dīvu. Jis ilgi nadūmuoja i pa tū trepi tiuleņ suoka leist iz dabasim. Cik tī jis leida – leida, bet īleida pi pošu dabasu durovu un sytās pi durovu. Svātais Pīters attaisa durovys un vaicoj nu ceļaveira: “Kū tev vajag?”
Veirs jam atbild “Laid mani dabasūs! Es gribu parunuot ar pošu Dīvu.”
Svātais Pīter ceļaveiram runoj: “Es tevi laist dabasūs navaru. Par tū, ka tu esi grēcinīks cylvāks. Tev vajag paprīšku iz zemis nūmiert un tūlaik tu vari patikt iz dabasim.”

Kaida beja tei motivāceja dzīsmis izpildēt latgaliski, byut latgalīšu grupai?
Hmm, es laikam tagad varātu ilgi i dikti stuostēt, ka tys nuok nu sirds, ka tei ir muna dzymtuo volūda i ka es jimā dūmoju i deļ tuo dzīžu tai kai dūmoju. Bet eisteneibā vyss ir daudz vīnkuoršuok – spielejam tai kai skaņ vyslobuok. Ja vyslobuok skanātu latviskai voi angliskai tod dzīsmis biutu itymuos volūduos.

Par kaidom temom jyus porsvorā dzīdot – ļūbesteiba, myužoguo suope..?
🙂 zyni, vīns cylvāks raizi sacieja ka myusu dzīsmis ir ni par kū. Nu suokuma beju dusmeigs – kai tai! Pazaver pats iz seve! Bet peic tam padūmuoju i saprotu ka jam ir daļeji taisneiba. rerdz – es uzskotu ka dzīsme var tik tīšom byut ni par kū, bet nikas arī ir koč kas i jis roda sajiutu… ja dzīsmei ir sajiuta tod dzīsmī ir dzīsma navys panteņu savirkniejums. Tai ka – miusu dzīsmis ir par sajiutom.

Kas roksta dzīsmis,tekstu,melodejis?
Puorsvorā es, bet juoatzeist ka dažreiz ir tai ka dzīsme palīk pavysam sovaidoka nakai tū beju īsadūmuojs, kod jū spielej vysa grupa. Tai ka – kotrs nu grupys koč kū īlīk jebkurā dzīsmī.

Kaidi ir gupys tyvokī lelokī plāni – koncerti, konkursi?
Plānu nav – juospieļej. I prūtams – gribam kliut pasauļa mārūga grupa! hehe 🙂 a ja nūpītnuok – lai miusus klausuos ari peic 100 godim.

Varbyut dreiži gaidoms albums?
Ja vyss īs kai smārāts, tod byus oktobra vydā.

Pyrms kaidim koncertim, uzastuošonys jius mādzot kai nibejs kūpā morāli nūzaskaņot – kaidu ritualu?
Nikaidu ritualu nav, ja nu vīneigi 5 min pyrms koncerta nūskaņojam gitaris i paberzejam papeirā mediatorus – lai nasļeid uorā nu pierstim. 🙂

Kas ir trokokīs kū asot dariejuši koncerta laikā?
Nu – es bīžai ruodu vysim mēļi. Par puorejim nazynu – nāsmu īvāruojs.

Kai jiusim līkās, kas ir vajadzeigs latgaliski dzīdūšai grupai, lai veiksmeigai tyktu iz “lelos skatuvis”, Latvejis, Eiropys šovbiznesā?
Par tū lai dūmoj menedžeri i vysaidys producentu grupys 🙂 deļ tuo, ka par zvaigzni var pataiseit gondreiž jebkuru. Cyta runa ir par dabiskū popularitāti – te juoatzeist, ka lai kliutu popularam pasauļī laikam biutu juodzīd angliskai, voi ari juoveic vyspuoreja pasauļa latgaļiskuošona.

Kur var dzierdēt, redzēt “Dabasu durovys”? Voi jiusem ir fanu klubs, sātys lopa?
dd.atzolys.lv
www.draugiem.lv muzykys sadaļā i www.myspace.com/dabasudurovys
fanukluba nav 🙂 hehe 🙂

Intervejis nūslāgumā jautojums -Kū grybātu nūvēlēt LaKuGys skaiteituojim, sovim fanim i vīnkorši tim, kurim pateik jiusu muzyka?
Uj, griutai maņ ar tim nūvieliejumim. Paldis, ka asat kūpā ar myusim – muzyku spielejam 2 īmaslu dieļ: 1.kuort deļ sevis 2.kuort deļ jiusim! Runojit latgaliski jebkurā vītā naskotūtīs ni iz kū!
Klausitās LOBU muzyku, prūtit atšķiert nu tuos muzykys, kuru jius asat spīsti klauseitīs. Klausatīs daudz muzykys, naīzaciklejatīs iz koč kū vīnu! Meklejit sajiutys…

Ar Arni sasarunova Aiga Sprindža