Ar sovu dvēseli sovuos dzīsmēs. Weron Martin.
![](https://lpr.gov.lv/wp-content/uploads/2007/bodrap-bildis/954.jpg)
Suokumā vaicuošu, kaids ir Tovs eistīs vourds, kas sliepās zam pseidonima Weron Martin?
Zam pseidonima sliepās tam dīzgon leidzeigs eistais vuords – Verners Martinovs.
Ar kū Tu nūsadorboj kasdīnā, kū vuicīs,struodoj i kaida ir Tova profeseja?
Ujj…Tūs lītu ikdīnā tik daudzi, ka gryuši saskaitiet. Bet, ka padūmoj – laikam šūreiz nabyušu originals. Škola i muzyka. Pošlaik studeju RTU (Reigys Tehniskajā Universitatē), Byuvnīceibys fakultatē. Nuokūtnis profeseja byus saistieta ar inženierkomunikacejom ci vīnkuoršuok sokūt – ar gaisu, syltumu i iudini. Bet tys peic pours godim. Pošu reizi struodoju (tai pastuoveiguok) Latgolys Radejā. Kūpā ar Edeiti vodom “Čaja vokoru”. Juosoka jai paļdis, ka jei pacīš munys skraidiešonys, liduošonys i dažraiz ari munys naizdarātuos lītys… Bet apsūlu lobuotīs! 🙂
Deļ kam tīši Weron Martin? Kai roduos itys nūsaukums?
Gryuts jautuojums. 🙂 Bet, eisteneibā, pavysam vīnkuoršai – beja dzīsme, vajadzieja izpiļdeituoja vuordu. Nagribieju sovu eistū, lykuos – vāga kū nibeis drusku sovaiduoku. Tai arī roduos Weron Martin – tys taids kai muna vuorda i uzvuorda “eiropiziets”, internacionaliziets variants. 🙂
Weron Martin ir vīns voi ar Tevi dorbojas arī cyti cylvāki, pavadūšuo grupa?
Leidz šam beju vīns. Koncerti parosti beja akustiskī, pīaicynuoju paleigā cytus gitaristus (Kristapu Kaļiņinu, Miku Ulmani), bet tagad teik formiets pylns grupys sastuovs, kas jau gondreiž ir izdarāts da golam. Nu i tod suoksim gatavuotīs koncertim!
Kod Tu saproti, ka gona dzīduot dušā i juosuok uzastuot i paruodeit sevi plašuokai publikai zam nūsaukuma Weron Martin?
Jau nu mozom dīnom saprotu (ari dzīduoju dušā 🙂 ), ka pateik spēleit vys kaut kaidus instrumentus, ka pateik ari pošam radiet tū muzyku. Pusaudža godūs kaut kū tai pa jūkam rakstieju, bet 2006. goda vosorā nūliemu, ka vajag vīnreiz tai lītai pīīt kluot nūpītnuok. Tai nu arī roduos suokumā “Dabasi raud” demo verseja, a tod jau i aranžātais goladorbs. Turpynuojums tam vysam pagaidom ir jaunuokais singls “Pasoki man”.
Kaidu instrumentu Tu lobpruotuok jam rūkuos iz skatuvis?
Gitara. Kaut ari tū, atškireibā nu citim instrumentim (klavīris, saksofons i bungys), spieleju saleidzynūši naseņ, vīnolga jai ir īdalieta leluokuo lūma. Par kū tai? Nazynu. Vīnkuorši pateik. Bet gon jau iz skatuvis pajimšu rūkuos arī kaidu cytu “štrumentu”!
Dzīsmis, kū Tu dzīdi, ir Tovys poša raksteituos? Kas ir teksta i melodeju autors?
Nui. Dzīsmis dzīdu tikai poša rakstietuos. Gūdeigi pasciešu, ka maņ napateik taisiet rimeikus, puorveiduot kaida cyta jau radātū. Maņ pošam pateik radiet. Melodejis autors pagaidom vysom dzīsmem asu es pots, bet teksts – kai kurai. “Dabasi raud” ir muns, bet, pīmāram, jaunajam singlam “Pasoki man” teksta autore ir Ilze Sperga. Taipot ari sazadorbojūs ar Iretu Čeksi. Eisteneibā, esmu atvārts jaunom idejom i sadarbeibom, maņ pateik mainietīs, pamieginuot koč kū sovaiduoku.
Kaidi ir Tovi nuokūtnis plāni saisteibā ar muzyku?
Pagaidom leidz golam teik veiduots grupys sastuovs, i teik struoduots pi jaunom dzīsmem i koncerprogrammys. Dūmojams, ka vosorā klausietuoji vareis skateit i dzierdēt myusus kluotīnī dažaidūs pasuokumūs. Taipot arī teik struoduots pi jauna singla. Vyss nūteik! 🙂
Voi vari pačukstēt myusim- cik tuoļi voi tuvi ir Weron Martin solo albums?
He-he… 🙂 Zini, kai soka – sovus sapynuos atkluot nadreikst! Bet šūreiz, arī grybūt, laikam nasaīs objektivai atbiļdāt iz itū vaicuojumu… Par tū, ka gondreiž kotru dīnu nūteik kas jauns, dažaidi paviersīni, kas līk dūmuot par jaunom idejom, īspiejom i tamleidzeigai. Pi tam itymā breidī navaru 100% apgolvuot, ka tys byus soloalbums… Bet tū, ka byus – tū gon varu! Vaicuojums tikai – cik dreiži?
Stuost, kas, Tovuprot, ir juobyut myusdīnu laikam atbyusltūšai dzīsmei, lai tei “izasystu” pašreizejūs muzykys topūs?
Gryuši pasceit. Dzīsmis var īdaleit vairuokuos kategorejuos – taidys, kas ir izklaidei, taidys, kas vairuok emocionalys i dvēseliskys. I tys, kas ir topūs, vairuokumā gadiejumu, ir izklaidis variants. Pādejā laikā pazaruoduos vairuok tūs dzīsmu dvēselei, bet na vysod tys, kas ir topūs, ir tys pots lobuokais.
Kai tu dūmoj, kas ir tei dzirksteļeite, kas ir izskriejuse cauri Latgolys radejis klauseituoju sirdim, klausūtīs Weron Martin dzīsmi “Dabasi raud”, deļ tuo ka itei dzīsme ir Latgolys radejis goda spieļuotuokuo dzīsme 2007. godā?
O! Pateišam??? 🙂 Gūdeigi sokūt, Tu maņ paziņuoji jaunumu! Paļdis! Nasliepšu, pateikamai! 🙂 Bet tei dzirksteleite drūši vīn ir tei, ka tymā dzīsmī beja īlykta dvēsele I ari dīzgon lels dorbs. Golvonais, ka jei ir patīsa i sovā byuteibā vīnkuorša. I kai pyrmuo dzīsme, drūši vīn, beja kaut kas jauns, nadzierdāts i drupeit sovaiduoks.
Kotram bierneibā ir kaids sapns – kaids ir Tovejīs i vai esi jau tū pīpiļdiejs? Varbyut kaida profeseja, par kū gribieji kliut, “kod izaugsi lels”?
Itys stuosts “Kod izaugšu lels” maņ asociejuos ar tū, ka stuoviešu iz skatuvis ar gitaru rūkuos! 🙂 Redz’, ka pīzapildiejs! Bet sovaiduok – daudzi maņ beja ideju, kū es grybu dariet, kas es grybu byut. Daudzreiz nūmainieti plani par vuiciešonūs augstškoluos, bet pagaidom esmu atrads tū kūpsaucieju i, golvonais, esmu apmīrynuots. Maņ pateik!
Kai ir ar kuriozim iz skatuvis-ir saguojs sarkt?
Tai kai pagaidom beja spielāti puorsvorā tikai akustiskī koncerti, tod eipaši kuriozi nav bejuši. Parosti sarkšona ir peic kaida koncerta, verūtīs sovu uzastuošonūs. Es taids paškritisks cylvāks, vysod pi kuo ta “pīzakosūs”, atrūnu, kū juouzloboj. Bet tai kai tagad dreiži gaidamys uzastuošonuos kūpā ar pavodūšū sastuovu, tod dūmoju, ka vysa jautreiba vēl tik prīškā!
Īzadūmuosam kaidu amizantu situaceji – Tev ir juorunoj lelys auditorejis prīkšā, i tu sajyuti, ka tovom biksem tryukst pūga i biksis nabyus spiejeigys nūzaturēt sovā vītā – kai Tu izīsi nu situacejis?
Drūši vīn tū bikšu defektu sovā runā puorviersšu par efektu – sapeišu ar kontekstu! Kaidā veidā? A tys atkareigs nu temys, par kū runuošona. 🙂
Kaidam godalaikam Tu lobuok dūd prīkšrūku attīceigajā situacejā – kupanā da celim voi sīnā leidz padusem? Deļ kuo?
Itymā situacejī, kaida volda tāņ, lobuok dūtu prīkšrūku kupanā leidz padusem! 🙂 Bet doba jau diktej sovus lykumus, deļ tuo juopalīk vīn pi tuos zīmys bez snīga…
Kur var satikt Weron Martin?
Weron Martin var satikt iz skatuvis koncertūs, pasuokumūs, pa laikam arī radeju topūs. A vot mani var satikt iz īlys, autobusā, vilcīnī, školā, veikalā, radejā i vysur kur cytur. Ar tū es vīnkuorši gribieju pasaciet, ka Weron Martin ir tys, kas tī stuov iz skatuvis, bet tepot ikdīnys gaituos ir sastūpams tikai Verners. 🙂
Weron Martin ir sova sātys lopa, fanu klubs – kur var atrast kaidus kontaktus ar tevi?
Pošlaik sātys lopys vāļ nav. Kod nūzaskaidruos visi nuokūtnis plāni leidz golam i nūzastabilizāsīs, tod arī byus. Sovaiduok nazagribīs tū informaceji tī mainiet kotru dīnu. Bet pagaidom drūši varit mekliet i klausātīs portala draugiem.lv muzykys sadalī! Kontakti ir atrūnami tī pot – kaut vai viestuli uzrokstit! 🙂
Nūslāgumā grybātu vaicuot kū Tu grybātu nūvielēt sovim fanim i LaKuGys skaiteituojim jaunajā 2008. godā?
Golvonais, lai daudzi prīka i saulis, mozuok bāduotīs i jimt vysu “vīgluok”! I tod jau kotrs atrassim sovu breinumu! Veiksmi! 🙂
Ar Verneru sasarunova Aiga Sprindža