Latgolys Radejis zinis (12.02.2008.)
Šudiņ Eiropys Savīneibys informacejis agentura sadarbeibā ar Dienvidlatgolys navalstiskū organizaceju (NVO) atbolsta centru reikoj informativu seminaru par projektu konkursu NVO diskusejis veicinuošonai sabīdreibā par ES vaicuojumim. Projektu konkursa mierks ir finansiali atbalstēt projektus, kas sabīdreibā veicinoj diskuseju par ES vaicuojumim. Seminars nūtiks Daugavpiļs rajona padūmē pl.10.00. Projekta konkursa nūsacejumi, īsnīgumu veidlopys, metodiskī īsacejumi i cyta informaceja atrūnama Es informacejis agenturys teimekļa vītnē “www.esia.gov.lv/lat/nvo_konkurss/”.
Nu šudinis īdzeivuotuoju pījimšona pi Rēzeknes dūmis deputatim nūtiks jaunuos telpuos Rēzeknis dūmis 1.stuovā, 107.kabinetā. Da šam īdzeivuotoju pījimšonai pi deputatim nabeja tam speciāli atvālātys telpys. Šudiņ īdzeivuotojus pījims ari Rēzeknes dūmis prīkšsāduotuoja vītnīks Juris Začests.
Šudiņ pl.13.00 Daugavpiļs dūmē, etniskūs bīdreibu centrā nūtiks diskusija “Sociāli atbildīgs spēļu bizness Daugavpilī: šodien un rīt”. Latvejis spieļu biznesa asociaceja (LSBA) ītūgod turpynoj pārn aizsuoktū regionalū diskuseju cyklu, lai skaidruotu pastuovšūs aizsprīdumus i problemys Latvejis piļsātuos, kai ari lai runuotu par prīkšnūsacejumim spieļu biznesa atteisteibai nokūtnē. Itaids publisks diskuseju cykls par spieļu biznesu Latvejā teik organizāts pyrmū reizi. LSBA ir sabīdriska organizaceja, kura puorstuov spieļu biznesa nūzarē struodojūšū uznāmumu intereses vaļsts i sabīdriskajā sektorā.
Itūnedeļ Daugavpiļs rajonā dorbu suokušys četrys jaunys TELE 2 GSM bāzis stacejis, kas īvaruojami uzlobūs mobilūs sakarus vysā regionā. Jaunuos stacejis atsarūn Daugavpilī Sportā īlā i Skolas īlā, kai ari Daugavpiļs rajona Tabores i Leiksnys pogostā.
Jākubpiļs piļsātys bibliotekā apskotama literaturys izstuode „Tautas sirdī iedziedāta dzeja”, kas veļteita divejom tautā īmīļuotom ailineicom : myusu nūvodnīcei Ārijai Elksnei, kura dzeivuojuse Krystpilī, beiguse Jākubpiļs 1. vydsškolu, i Madūnys rajona Murmastīnē dzymušajai ailineicai Martai Bārbelei. Ārijai Elksnei ituo goda febralī apritātu 80 godi, nu jei myužeibā aizguoja 56 godu vacumā – 1984. godā. Marta Bārbele dzymuse Madūnys rajona Barkavys pogostā. Studejuse filologeju, struoduojuse par školuotuoju i bibliotekari. Myužeibā aizguojuse 2003. godā.
Pārnajā dīnnaktē samozynovuos kravys automašinu rindys iz Latvejis i Krīvejis rūbežis. Terehovys rūbežkontroles punktā šūreit izbraukšonu nu vaļsts gaideja 300 kravys automašynys, kas ir par 50 muozuok nakai vakar. Sovukuort Grebņovā šūreit ryndys nabeja, lai ari veļ vakar tī ryndā gaideja 50 spākroti.
