Latgolys Radejis zinis (11.02.2008.)
Šudiņ, Ludzys dūmis izpilddirektora vītnīka omotā dorbu suok Frīdijs Bokišs. Ludzys dūmis janvarī izsludynuotajā konkursā iz Ludzys dūmis izpilddirektora vītnīka vakantū omota vītu pīsasacie četri kandidati, tūs vydā arī Bokišs. Izviertejūt iz Ludzys dūmis izpilddirektora vīnīka omotu pīsasacejušuos kandidaturys, itam nūlyukam speciali izveiduota komiseja nūlēme virzeit Bokiša kandidatūru iz izskateišonu dūmis sēdē.Latgolys apgoboltīsa šudiņ plānoj skateit kriminallītu, kuramā par kukuļuošonu i starpnīceibu kukuļuošonā apsyudzāts SIA “Magvejs” direktors Valērijs Vasiļjevs i SIA “OVI” vaļdis prīkšsādātuojs miljonārs Vladimirs Oderovs. Iz itū breidi tīsa nūpratynuojuse 11 līcinīkus, vēl atlics nūpratynuot septeņus.
Septembrī Leivuonūs, Pastariņa suokumškolā, planavuots attaisteit pyrmsškoys izgleiteibys īstuodi “Rūķīši”, taidejaidi samazynojūt pyrmsškolys izgleiteibys nūslūguoteibu Leivuonu nūvodā, ryndā iz vītom pyrmsškolys izgleiteibys īstuodēs reģistrāti apmāram 200 bārnu, deļ tam pašvaļdeibys prioritāte itymā godā ir pyrmsškolys izgleiteiba.
Itūgod Valentindīna Ludzā nu īprīkšejim godim atsaškiers ar tū, ka 14. febralī Sorkonuo Krysta Ludzys komitejis ustobuos nūtiks ašņadonoru dīna. Sorkonuo Krysta Ludzys komiteja visim ašņa zīduotuojim ir sagatavuojuse Valentindīnys duovonys. Ludzys piļsātys i rajona dzeivuotuoji ašni varēs zīduot jau nu devenim reitā.
Febralī suocēs Jākubpils dūmis ākys rekonstrukceja, leidz ar tū nu šudiņdīnys Jākubpils dūme dorbuosīs Jākubpils Tautys noma ustobuos Vacpiļsātys laukumā 3., kur atsarass visi dūmis darbinīki, izjamūt Byuvnīceibys nūdaļu, kura remonta laikā struoduos Breiveibys īlā 118, i Arhitektūrys plānuošonys nūdaļu, kuruo struoduos Jaunajā īlā 31 c.
Šudiņ, Preiļu piļsātys dzimšonys dīnā, Preiļu kultūrys nomā sešūs nūtiks jubilejis goda īskaņis koncerts, kuramā muzicēs čellu trio “Melo-M”. Iz pasuokumu kultūrys nomā aicynuoti visi bejušī piļsatys dūmis vadeituoji, kurim pošareizejuo dūmis vadeiba pazasaceis par dorbu i pasnīgs pīminis suvenirus.
