Latgolys Radejis zinis (5.02.2008.)
Daugavpilī saslimsteiba ar gripu epidemioloģiskū leimini puorsnīguse gondreiž 5,5 reizis – iz 100 000 īdzeivuotuoju registrāti 533,4 saslimšonys gadejumi. Nu saslymušajim 58 cylvāki, golvonūkuort bārni i jaunīši, ir hospitalizāti. Nivīnam nu hospitalizātajim nav konstatāti sarežgejumi. Nasaskotūt iz arvīn pīaugūšū saslimsteibu ar gripu, muoceibys nivīnā nu Daugavpils muoceibu īstuodem nav puortrauktys.
Preiļu vacticeibnīku draudze planoj īsaguoduot bazneicys zvonu, kū Preiļu dīvnomā itūgod varātum uzstuodeit i īsvieteit pyrma Vosorys svātkim. Bazneicys zvons piec pasyutejuma izmoksuos vairuok nakai 3000 latus, nu kurim 757 lati ir draudzis lūcekļu zīduojumi, bet puorejūs leidzekļus – 2618 latu – pīškeira Preiļu nūvoda dūme. Zvons sver 250 kilogramus.
Jākubpils rajona padūme izsludynuojuse pretendentu pīsaceišonu Goda prēmejai kultūrys jūmā. Pasuokuma mierkis ir nūsaceit lobuokūs Jākubpils rajona kultūrys darbinīkus i apbolvuot jūs par īguldejumim kulturys atteisteibā Jākubpils rajonā. Prēmeja teik pīškierta par nūzeimeigu īguļdejumu kulturys atteisteibā, par veiksmeigu kulturys pasuokumu sareikuošonu, kas veicynuojuš Jākubpils rajona atpazeistameibu Latvejā i uorpus tuos.
Šudiņ Rēzeknis piļsātys dūmē iz sanuoksmi puļcejās Eiropys tautu festivala dorba grupa. Tei īceriejuse puorrunuot ar festivala nūrisi saisteitūs vaicuojumus. Atguodynojam, ka festivals Rēzeknē nūsarysynuos nu 27. juļa leidz 1. augustam. Dūmē šudiņ paradzāta sanuoksme arī par daudzfunkcionāluos koncertzālis metu konkursa nūlykumu i konkursa viertiešonys žūreju, vēl ituos nedelis laikā paradzāta sanuoksme par koncertzālis tehniski ekonomiskuo pamatuojuma izstruodi.
Daugavpilī 19. febralī piec remonta durovys vaļā taiseis Latgolys centrāluo biblioteka. Bibliotekys telpys ir ni tikai izremontātys, bet arī palykušys plašuokys. Ja leidz remontam biblotekys telpu kūpejuos plateiba beja 945 kvadrātmetri, tod tagad tei byus jau 1400 kvadrātmetri. Izremontātajā bibliotekā dorbojās diveji abonementi i treis laseitovys. Tei ir apreikuota jaunom mēbelem, tehniku vuojredzeigajim cilvākim i interneta pīslāgumu. Bibliotekys remonts izmoksuojs 400 000 latu, tymā skaitā valsts investīcejis – Ls 300 000 i pošvaldeibys pīšķiertais finansiejums – Ls 100 000.
Leidz 10. febraļam nūteik Bolvu pilsātys 80.dzimšonys dīnys pasuokumi. Šudiņ, 5. febralī, Balvu pilsātys izgleiteibys īstuodēs nūtiks eseju, zeimiejumu konkursi, sporta aktivitātis.Sovukuort reit plkst. 17.00 foto galerejis “Es – balvenietis – atpazīstamās Balvu pilsētas ainavās” atvieršona piļsātys Kultūrys i atpyutys centrā.
