Latgolys Radejis zinis (1.02.2008.)
ES veseleibys komisārs Markoss Kiprianu diveju dīnu vizitē apmeklej Latveju, kab īsapazeitu veseleibys aizsardzeibys sistemu i drūšys puortykys ražuošonu i kontroli. I šudiņ kūpā ar Zemkūpeibys ministru Mārtiņu Rozi M.Kiprianu apmeklēs Terhovu.
Vakar Reģionāluos atteisteibys i pošvaļdeibu lītu ministrejā Koordinācejis padūmis sēdē apstyprynuota Rēzeknis piļsātys integrātuos atteisteibys programma i projektu idejis. Rēzekne, dūmojūt par tuos turpmuokū atteisteibu, izvyrza sevi kai Austrumlatvejis kultūrys i izgleiteibys centru.
Nu šudiņdīnys Kruoslovā pīaugs vacuoku moksa par bārnu ādynuošonu pyrmsškolys izgleiteibys īstuodēs, itaidu lāmumu pījāmuš Kruoslovys nūvoda dūmis deputāti. Da šam vacuoku moksa par vīna bārna ādynuošonu Kruoslovys pyrmškolys izgleiteibys īztuodēs beja 85 santimi dīnā, ja bārns apmeklē īstuodi 10,5 stuņdis i 60 santimi, ja bārns apmeklē īstuodi septeņis stuņdis. Nu 1. febraļa itei moksa byus attīceigi lats ci 70 santimi.
Nu šudiņdīnys Rēzeknē vīnys braukšonys biļetis cena pilsātys sabīdriskajā transpotā byus par 10 santimim duorguoka i moksuos 30 santimus, braukšonys moksa pīaug saisteibā ar inflāceju, dīzeļdegvīlys cenu kuopumu, kai arī pamatojūtīs iz piļsātys īdzeivuotuoju īnuokumu pasaaugstynuošonūs. Uzjāmumā uzsvēre, ka da šam Rēzeknē braukšonys moksa pilsātys sabīdriskajā transportā beja vīna nu zamuokajom vysā vaļstī. Arī Daugavpilī par pīcim santimim pīaugs moksa par sabīdriskuo transporta izmontuošonu – itaidu lāmumu pījēme Daugavpils dūmis deputāti, i nu šudiņdīnys moksa par vīnreizeju autobusa ci tramvaja izmontuošonu piļsātys maršrutūs pīaugs leidz 25 santimim.
Nu šudiņdīnys 84 Rēzeknis Augstškolys pylna laika studentim braukšonys moksa Rēzeknis piļsātys maršrutūs tiks kompensāta 50% apmārā nu mienešbiļetis moksys. Rēzeknis dūmis lāmums arī paredz, ka studenti mienešbiļeti varēs izmontuot dorba dīnuos vysa muoceibu goda laikā, izjamūt juļa i augusta mienešus, Rēzeknis piļsātys maršruta taksometrūs, atbyulstūši Rēzeknis augstškolys apstyprynuotajam sarokstam.
Šudiņ sešūs Daugavppilī Kultūrys i sporta pilī nūtiks trašais etniskū bīdreibu sadraudzeibys pasuokums “Etnisko biedrību tikšanās gadu mijā”. Pasuokumā daleibu jims vairuok nakai 200 puorstuovji nu pīcpadsmit Daugavpils etniskajom bīdreibom. Pasuokumā par īguldejumu sovys kultūrys saglabuošonā i starpkultūru dialoga veicinuošonā etniskū bīdreibu aktīvistim tiks pasnīgti Daugavpils dūmis pateiceibys roksti i Naturalizācejis Puorvaļdis Daugavpils reģionāluos nūdaļis atzineibys roksti. Pasuokumā pīsadaleis arī Īpašu uzdevumu ministrs sabīdreibys integrācejis lītuos Oskars Kastens, Krīvejis ģenerālkonsuls Daugavpilī Nikolajs Vihļajevs i cytys oficiālys personys.
Vakar Paula Stradeņa Klīniskajā universitātis slimineicā pasaulē nuokuš treineiši – divejis meitineitis i puiseits. Visi treis jaundzymušī atsarūn slimineicys intensīvuos terapejis nūdaļā. Treineišu vacuoki ir nu Daugavpils.
