Puiši ar “garūzeni”. CRUST

LaKuGa skaiteituojam teik pīduovuota jauna interveja ar latgalīšu muzykim. Itymā reizē jaunuokuo Latgolys Radejis TOP 20 pyrmuos vītys īguvieji – CRUST.

Īsapazeisam – kaids ir grupys “Crust” sastuovs. Kai Jius sauc (ari īsaukys) i kū kotrs dorit grupā?
Grupā “Crust” spielej 3 puiši nu Varakļuonim – Kārlis, Sandris i Āris. Kārlis spielej basgitaru i pa šaltim naz kū padzīž, Sandris spielej bungys a Āris gitaru.

Ar kū nūsadrobojat kasdīnā – kū vuicatīs, studejot?
Kārlis vuicuos Varakļānu vydusškolā a Sandris ar Āri ar dažaidom sekmem studej augstškoluos baiguos gudreibys datordizainā i ekonomikā. Carams, ka laiks, kas pavadeits studejūt ekonomiskas gudreibys, atsamoksuos i kaidu dīnu izadūsīs valstī samazynuot inflaceju.

Kod i deļ kuo izdūmovot veiduot grupu?
Grupa izaveiduoja 2004. goda 13. augustā kai protesta forma rītumu lelvalstu politikai attīceibā pret Etiopijas bodacītiejim. Bet ja tai nūpītnai, tod mes asom kūpā pazasokūt Backstreet Boys producentim.

Kū nūzeimoj nūsaukums „Crust” i kai jius pi taida tykot?
Nūsaukums tulkuojumā nu angļu volūdys nūzeimoj „gorūza”. Apmāram kai maizis gorūza tik nav maizis gorūza. Bet vyspuor itam nūsakumam nav nikaidys dziļuos dūmys apuškā, vīnkuorši itys beja pyrmīs vuords, kas īkryta acīs atšķirūt angļu volūdys vuordineicu. Labi, ka pa rūkai napazagadeja turku volūdys vuordineica, par tū, ka tod mes sauktūs „yüzsüzlük”.

Nūdefinejit poši – kaida stila muzyku Jius spēlejot?
Tū patīseibā ir dīzgon gryuši izdareit par tū, ka grupys dalinīki klausās i ir īzaspaiduojušs nu dīzgon dažaidys muzykys, i ari mysu pošu dzīsmēs var dzierdēt šū tū nu dažaidim stilim. Dūmoju, ka muziku kuru spēlejam var drūši saukt par latgaļu roku.

Kai ir bejs ar grupys sastuovu – ir mainiejīs?
Grupā suokumā spieleja ūtrs gitarists Ilgvars, kurš beja ari vīns nu grupys dibynuotojim, bet paguojušā vosorā jis devēs iz uorzemem i atsagrīzīs grupai vairs napīzavīnuoja. Tai nu tāņ spielejam trejatā. Veļ grupā iz 2 dīnom beja treistyura spieļuotuojs, bet mes jam dīz kai napatykom i jis grupu pamete. Taipat Muzykys Skrytulī 2006 grupai beja pīzavīnuojīs tamburinists Alvis, bet tys beja tikai i vīneigi komercialus nūlyukūs…

Grupys “Crust” dzīšmu pyurs sastuov nu jaunrodem, popularys muzykys – kaids ir repertuars?
“Crust” repertuars nu jau kaidu laiku pamatā sastuov nu jaunradem, bet spielejam ari popularu dzīšmu kaverversejis. Dzīsmis ir bejušs gon latviski, gon angliski, bet niule tūp tikai latgaliski.

Kai tūp jaunys dzīsmis – kurš nu Jiusim ir dzīšmu radeituojs – teksti, melodejis?
Golvonais dzīšmu melodeju radeituojs ir grupys vokalists Kārlis i pīpaleidz Āris, a tekstus rokstam vysi. Parasti mieginuojumā kaids padūd ideju i nu tuo tūp dzīsme.

Kaidā volūdā jius lobpruotuok grybātu dzīduot, kurā jiutotīs lobuok?
Asom pamieginuojuši dzīduot i latviski, i latgaliski, i angliski, bet tāņ asom palikuši pi latgaļu volūdys. Navarātu saceit, ka dzīžūt kaidā nu volūdom juitamīs slyktuok voi lobuok, bet tai kai asom grupa nu Latgolys tod niule dzīduosim latgaliski. Kai ba ir dūma īrakseit kaidu dzīsmi gon latviski, gon latgaliski.

Kaidi ir Jiusu plani iz prīšku kai grupai?
Ījimt pasauli. Ar gaismys zūbanim…

Kai Jiusim ruodīs, kas ir vajadzeigs latgaliski dzīdūšai grupai, kab tū pamaneitu ite Latgolā, kai ari plašuok Latvejā, Eiropā?
Latgaliski, tai pat kai jebkurā citā pasauļa volūdā, dzīdūšai grupai, lai tei tyktu pamaneita ir vajadzeigys lobys dzīsmis. Voi juopīdzimst ar vuordu Parisa Hiltone.

Kurys varātu byut tuos pasauļa slavanuos voi ari pošmuoju grupys, kas Jiusus īdvasmoj?
Taidu grupu ir cīš daudzi, i dīz voi kaidu var eipaši izceļt. Puorsvorā tuos gon ir pasauļa slavanuos grupys. Vīnnūzeimeigai, īdvesmoj gitarmuzyka. Kotram grupys dalinīkam tuos grupys ir cīš dažaidys, kotrs klausamīs koč kū cytu i daļu nu tuo īlīkam sovuos dzīsmēs.

Pastuostit, kaidi kuriozi gadiejumi ir bejuši Jiusu koncertu laikā? Voi kaidys naārtys situacejis, kod ir saguojs sarkt?
Koncertūs ir tryukušas steigys, pat i gitarys siksnys, bet nu kuram nazagoda. Nikas taids, kas tai cīš izaspīstu atminī nav bejs, ka naskaita koncertu, kura laikā skatuvis prīškā dancojūšuos fanis korstā vosorys vokorā izdūmuoja atvāsynuotīs atkailinūt dažaidys kermeņa dalis…

Jius asot jauni latgalīšu puiši – kai ir ar spīdzūšom fanem i slapanom mīlys viestulem?
Vysaiži ir guojs, i grupys vokālistam Kārlim daža beja uzaroduse stalkere.

Kaidi ir tyvuokī pasuokumi voi koncerti, kur varātu sastapt “Crust”?
Grupa “Crust” pošu reizi ir aizjimta rodūt jaunu materialu i par tū koncerti pagaidom izpalīk. Kod bys sataiseits repertuars latgalīšu voludā tod i byus kaids koncerts.

Kai ar “Crust” var sakontakteit Jiusu fani, interesenti – varbyut ir sātys lopa voi fanu klubs?
Ar grupu “Crust” var sazakontakteit caur draugiem.lv muzykys sadali – crust.draugiem.lv i zvonūt pa teleponu 29229689 Ārim. Tik golvonais nasajaukt pādejū deveitnīku ar ciparu seši.

Nūslāgumā, kū Jius grybātu nūvēlēt sovim fanim, LaKuGa’s skaiteituojim itymā Jaunajā 2008. godā?
Nadraudit dīnvidu centrālei dzerūt apeļsinu sulu sovā sātā!

Ar grupu sasarunova Aiga Sprindža