Smīklam i bazneicai

Vītejūs Latgolys laikrokstūs kod nakod pasaruoda i kaids raksteņš latgaliski. Cīši moz ir cylvāku, kuri prūt latgalīšu rokstu volūdu, ari redaktori baiļojās, kū par jim padūmuos i voi laseituoji saprass. Laseišonys līta ir dajiukšonys līta. Papruovejit palaseit latvīšu tekstus gotu šriftā! Runuot ir vīns, raksteit – nazkas cyts.

Ka ari pasaruoda kaids raksteņš, tod tys ir voi nu humoristiska voi religiska satura.

Humors vyscieškuok pīmynātajūs laikrokstūs īsamīsoj viestuļu formā – vīns latgalīts roksta viestuli ūtram latgalīšam voi nazkur iz puornūvodu ci Ameriku. Itymūs raksteņūs var izzynuot vacus ci rešus latgalīšu vuordus voi aforismus, mozuok pasasmīt.

Ar humoru myusim vysim ir problemys.

Kod roksta par i ap katuoļu lītom, cytu reiz ari teik izmontuota latgalīšu rokstu volūda. Vyscieškuok vacuo ortografeja, kura maņ ruodīs taida nadzeiva, nu latvīšu volūdys mehaniski puorlykta. Bet – raksteit vīnolga kai ir lobuok nakai naraksteit vyspuor.

Tys publicistikā i irā vyss. Uorpus ituos divsfereibys kaidi cyti roksti ir reša i fragmentara paruodeiba.
Par tū ituo roksta nūsaukumā taišni akcenteju ituos divys sferys.

Vyslatvejis laikrokstus ruodīs ka losa moz cylvāku – ruodīs, ka pavysam nalosa Latgolā voi Reigā dzeivojūšī latgalīši. Voi ari poši laikroksti tai dūmoj. Smejūs, smejūs…

Piec munim apriekinim Reigā latgalīšu ir vairuok nakai pošā Latgolā.

I prīks maņ par vysys Latvejis laikrokstim, kuri atsaļaun publicēt rokstus latgalīšu rokstu volūdā.

Cytu reiz Reigys laikroksti itymā lītā ir daudz drūsmeiguoki nakai lyluokuo daļa provincialū laikrokstu.

Edlajs Stivensons sacēja, ka demokrateja ir tī, kur var drūši justīs ari tī, kuri navā populari.

Vaicuojums par latgalīšu rokstveida tekstu adresatu ir pats suopeiguokais. Ūtrs – poši autori.

Ka runoj par latgalīšu dailliteraturu, to tamā ir tikai divys autoru kategorejis – diletanti i svātī. Daudzūs gadīņūs tuos obys apsavīnoj vīnā cylvākā.

Kod vysapleik traktori, apstruoduot sovu dryvu ar zyrgu var voi nu duraks, voi nu svātais (izaver leidzeigi, bet nikaida biologiskuo lauksaimisteiba tei navā).

Kod vajaga nūsorguot kaidu smiļšu kaļneni pi jyurys voi kaidu popularu omotpersonu nu atlaisšonys, pasaceļ voi vysa tauta. A kod izneikst vasala literaruo tradiceja, gon pošim, gon cytim par tū ir moza līta.

Pa manim, myusus vērtēs piec tuo, kū sovu asom saglobuojuši, tikai piec tam piec tuo, kū svešu asom pajāmuši.

Beiguos – lai puordūmuos dziļš i mīreigs Adventa laiks!

Valentins Lukaševičs, “Latvijas Avīze”, 2007.goda dekabrs.