Latgolys Radejis zinis (7.12.2007.)
Šudiņ Daugavpilī, vīsneicā “Park Hotel Latgola”, Latvejis Lelūs piļsātu asociaceja reikoj lelū piļsātu dūmju prīkšsādātuoju kūpsapuļci, kuramā tiks runuots par pošvaļdeibu finanšu izleidzynuošonys fonda jaunū modeli. Sanuoksmis dalinīki runuos par piļsātu politikys veiduošonu Latvejā. Sanuoksmē tiks runuots arī par Latvejis Pošvaļdeibu savīneibys statūtim, struktūru i bīdrim, nūsaslādzūt administratīvi teritoriālajai reformai i daudz kū cytu.
Gotovojūtīs paradzātajai rūbežkontrolis atceļšonai iz īškejom rūbežom, kai arī šengenys vīzu izsnīgšonys uzsuokšonai, Vaļsts rūbežsardze šudiņ Rēzeknē, Vaļsts rūbežsardzis koledžā, organizej semināru “Izmaiņas robežapsardzībā, robežkontrolē un imigrācijas kontrolē pēc pievienošanās šengenas līguma tiesiskajai telpai”, kuramā pīsadola omotpersonys nu Vaļsts rūbežsardzis Valmīrys, Viļakys, Ludzys, Daugavpils, Jelgovys, Līpuojis, Ventspils, Reigys puorvaļdem i Vaļsts Rūbežsardzis koledžys.
Šudiņ slēgs leigumus ar konkursā “Lauku nevalstisko organizāciju atbalsta programma” uzvariejušajom navalstiskajom organizācejom. Konkursā kūpā tyka atbaļsteiti 27 nu trešajā kuortā vārtātajim 57 projektim. Atbolsteitū projektu gaitā lauku reģionūs tiks veiktys dažaidys aktivitātis, pīmāram, Latgolys studentu centrs realizēs projektu “Latgales jaunieši = Latgales nākotne”, kam pīškierts atbolsts 2000 latu apmārā.
Šudiņ Daugavpils Universitātē nūtiks starptautiska zynuotniska konference “Reģionālās ekonomikas konkurētspēja: attīstības faktori globalizācijas apstākļos”. Konferencē tiks aptiemāti vaicuojumi, kas skar reģionāluos ekonomikys konkurētspieju, tuos sociālū i ekonomiskū nūdrūšynuojumu, kai arī vaicuojumi par finansiālū menedžmentu, tuo analīzi i puorvaļdi. Konferencē daleibu jims vairuoki desmiti zynuotnīku nu Boltkrīvejis, Latvejis, Pūlejis i Ukrainys.
Šudiņ Daugavpils Universitātē suoksīs i reit turpynuosīs pazeistamuo krīvu rakstnīka Sigizmunda Kržižanovska 120 godu jubilejai veļteita zynuotniskuo konference. . Konference īcarāta kai starptautisks forums par 1920. – 1930.godu krīvu literatūrys atteisteibys lykumsakareibom. Konferencē pīsadola vairuoki desmiti zynuotnīku nu Latvejis, Boltkrīvejis, Krīvejis i Taivānys.
Piec dzeivuotuoju lyuguma nu šudiņdīnys suoks kursēt autobuss maršrutā Leivāni-Jākubpils-Reiga i Reiga-Jākubpils-Leivāni. Itaida vīnuošonuos dabuota Leivānu dūmis sarunuos ar Satiksmis ministreju i SIA “Jēkabpils autobusu parks”.