Rēzeknes latgalīšu kuļturys bīdreibā ībolsuota vaļde
Ilgadejais bīdreibys vadeituojs P.Keišs snēdze nalelu īskotu liedzšinejā darbeibā: nūorganizāti pausauļa latgalīšu kongresi, uzstuodeits pīmineklis Nikodemam Rancānam, par gūdu Frančam Trasunam – pīminis pluoksne. Rēzeknes latgalīšu kuļturys bīdreibai ir bejuse sadarbeiba ar ministrejom, Latgalīšu kuļturys centra izdevnīceibu, Rēzeknis piļsātys dūmi, avīzi “Rēzeknes Vēstis” i Rēzeknes Augstškolu (RA) i cytim.
Sanuokšonā tyka atzeimāts, ka bazneica ir daudz darejuse latgalīšu volūdys sorguošonai, koč ari pādejā laikā ir vārojama paruodeiba, ka daudzeji prīsteri mises laikā lītoj kaidu cytu volūdu. Iz prīšku tod kūpeigim spākim juostruodoj, kab ari bazneicā latgalīšu volūda tyktu drūšuok lītuota i laikrokstā “Gaismas Taka” i “Zemturs” byutum vaira latgalisku rokstu.
21.decembrī paradzāts pasuokums par gūdu Vladislava Rubuļa 120. goda dīnai nu dzimšonys. A pavasarī paradzāts sareikuot koņferenci, kab apkūpuotum informaceji par 3.Atmūdys laiku.
Prīks, ka ari Rēzeknes piļsātys dūmes vadeituojs Juris Guntis Vjakse saceja uzrunu latgaliski. Jis izstuosteja, ka Rēzekne gryb izmontuot latgaliskus akcentus piļsātys tāla veiduošonā. Pusūtra goda laikā Rēzeknē vajadzātu tikt atkluotam pīminekļam par gūdu Fraņčam Trasunam.
G.Spradzenko atzeimeja, ka svareigi ir napagaisynuot latgalīšu volūdys lītuošonu saimēs, starp vacuokim i bārnim, kasdīnā itt.
I.Šuplinska aicynova suokt naatlaideigi dūmuot par īspiejom latgalīšu volūdys atsagrīsšonai školuos. Tyvuokajā laikā tiks apkūpuoti RA pietejuma rezuļtati, kura laikā tyka apvaicuoti 12000 ļaužu. Jou tagad asūt aptuveni zynoms, ka 80% vysu respondentu atbaļstejuši latgalīšu volūdu školā. Jei izsaceja prīku par Latgolys Studentu centra aktivitatem, kai ari eisumā pasadaleja ar īgiutū pīredzi Holandē, kur teik struoduots, kab saglobuotu i atteisteitu frīzu volūdu – jau bārnam pīdzymstūt, juo vacuoki sajem CD i cytus materialus frīzu volūdā kai deļ bārnu, tai i vacuoku izgleituošonys, a kašubu volūdu vuica bārnim nu 1. leidz 4.klasei.
Sanuoksmes nūslāgumā P.Keišs sūleja jau leidz Zīmyssvātkim sasaukt bīdreibys vaļdis sēdi.
