Jau šudiņ dūmojam par pasuocīnim nedelis golā
Augstuokuos tīsys (AT) Senats šudiņ rakstveida procesā turpinuos skateit krimināllītu, kurā kasacejis syudzeibu īsnīdzis par cītsirdeigu i vardarbeigu izaturiešonūs pret napilngadeigajim nūtīsuotais Baļtinovys kristeiguos specialuos internātškolys bejušais direktors Henriks Logins-Slišāns. Saskanē ar Latgloys opgoboltīsys sprīdumu jam pīsprīsta nūsaceita breiveibys atnimšona iz vīnu godi ar tikapt ilgu puorbaudys laiku. Leidz ar opgoboltīsys sprīdumu tika atcalts juņa beiguos pasludynuotais Bolvu rajona tīsys sprīdums, ar kuru Loginu-Slišānu itymā lītā atzina par navaineigu. Itū sprīdumu puorsyudzeja cītušū puorstuovji i Bolvu rajona prokuratura.
Ītureit samozynovušuos kravys automašynu ryndys iz Latvejis- Krīvejis rūbežys. Terehovys rūbežkontrolis punktā šūreit ryndā gaideja 800 kravys mašynys, kas ir par 50 mozuok nakai vakar, bet Grebņovā izbraukšonu nu vaļsts gaideja 380 spākroti, kas ir par 120 mozuok nakai vakar nu reita.
Trešdīņ, 28. novembrī pl. 11.00, Nūdarbynuoteibys Vaļts agentura(NVA) Jākubpiļs filiāle sadarbeibā ar Naturalizacejis puorvaļdys Daugavpiļs regionalū nūdali organizej informacejis dīnu Latvejis pilsūneibys pretendentim. Interesentim NP DRN Jākubpiļs filiālis vacuokuo referente Dace Circene snīgs informaceju par naturalizacejis procesa uzsuokšanai napīcišamajim dokumentim, kai ari par naturalizacejis puorbaužu saturu i nūrisis kuorteibu. Kotram, kas kuortuos izmieginuojuma testu, NP DRN eksaminacejis sektora darbinīki snīgs puorbaudys dorbā pīļautū klaidu analizi i rekomendacejis volūdys prasmju pilnveidūšonai i zynuošonu puorbaudei.
29.novembrī jau deveitū godu piec kuortys Rēzeknis Augstškolā nūtiks Andrejdīnys literāri muzikalais pasuokums. Muzykalajā daļā itūgod vysus prīcēs da Gunchi, bet sovus jaunuokūs dzejūļus skaiteis A.Rancāne, V.Lukaševičs, i cyti pazeistami i vieļ na tik zynomi jaunī dzejnīki. Kūpsauciejs pasuokumam ir REMONTS – augstškolys, dvieselis, ceļa, naceļa, teksta itt.
Pīktdiņ 30.novembrī Daugovpiļs rajona Kulturys nomā nūtiks bīdreibys „Latgalīšu Etnokulturys centrs” pyrmais pasuocīns, kura mierkis ir īpazeistynuot ar jaunizveiduotuos organizacejis darbeibys mierkim. Iz sovu attaisiešonys pasuocīni un iz sasadorbuošonu „Latgalīšu Etnokulturys centrs” aicynoj folkorys kūpu un etnografiskūs ansambļu vadeituojus un dalinīkus, tautys amatnīkus, muzykantus, tautys muokslys specialistus, kulturys darbinīkus, Latgolys pietnīkus, uzjiemiejus, pošvaļdeibu puorstuovus un interesentus.
Pīktdiņ, 30. novembrē Rēzeknis rajoa Silmalas pamatškolā pl. 15. nūtiks svineigs pasuokums par gūdu 100 godu jubilejai kūpš školys dybynuošonys. Jubilejis pasuokumā paradzātys školys vadeibys svineiguos uzrunys, bārnu koncerts i dzigu prīkšnasumi, absolventu tikšanuos, kai ari grūziņu vokors ar dzeivū muzyku.
