Zeidīšs
![](https://lpr.gov.lv/wp-content/uploads/2007/lg/399.jpg)
A vieļ seņuok i par cylvākbārnu muoti sacieja, ka jai ir lobs, voi nav pavysam, zeidīšs.
Vuords – zeidīšs ir napamatuoti aizmiersts. Ar zeidīši seņuok apzeimieja na viņ muoteišu zvārīm i sīvīšu – muošu cylvākīm pīneigumu, a vieļ – puornastā nūzeimē i vysu, nu kuo kas to na viņ barovuos.
Kas navuodeitu tādiņ, par pīmāri, saceit: „ Latvejis vaļstei goņ ir lobs zeidīšs, ka var uztureit 100 saeimys „gardiežus” i bīžū ministru rotaceju pa vaļdeibys noma „pīskari” ar vysuom pruovajuom atstuodynuošonys nu omota kompensacejuom!”
Voi otkon: „ Kas navuodej Latvejai – iz Latgolys zeidīša tureitīs!” Vyss Reigai i vyss Uorpuslatgolys ļaudīm, a Latgolai kikucs daguna prīškā ; sok, lai nasadraudzej ar krīvīšīm, lai narunoj sovā mielē … I vysi latgalīši tai i nūpluovoj, tai i aizmaun Reigys vierzīnī. A sova seņseniejuo, sova vīņvīneiguo, sova pasauļvierteiguo nav kas sagluob i sagloboj. Latveja nu sevis nūzalīgūšūs latgalīšu viņ latviska i pastuov. A Latgolai par tū – kikucs daguna prīškā. Par latvīšu tautys zeidīši Latgolu izmontoj vysi, a pošai zeideituojai līk palikt olkonai …
Nuj, nuj. Zeidīšs ir lobs vuords. Lobs vysaidā nūzeimē. I daže itaidā: „ Latgola ir lobs zeidīšs multikulturalai sabīdreibai ar pasaulis skaniejumu. Latgolā dzeivuodami ir pīsazeidušs pruota gudreibys daudzu tautu slovoneibys: latvīšu Rainis, Pumpurs, krīvu Tinjanovs, žydu Rotko i cyti. A cik vieļ uzvuordu var saukt nu pūļu, sūmu, boltkrīvu, tūs pošu krīvu i žydu, i latvīšu – čyuļu! Ar vysīm jīm lepojuos pasauļs i Latveja toža. Vysi izslivej Latgolu par lobu zeidīši.” A vīneigi – par nūžālu vysur izslivejūt Latgolu, pīmierst pošus latgaļus, kas davušs itū multikulturaluos vidis īspiejameibu, byudami toleranti pret tīm, kuri, naīvārojūt latgaļus, latgaļīm nadūdūt ņikaidu radzamu īspieju byut pošīm sovys multikulturaluos zemis apbreina iznesiejīm pasaulī, kai multikulturaluo pasauļa vierteibu. I ņivīns nadūmoj pasauļam iznest, izklīgt, izruodeit latgaļu personeibys ar daudzpatņu davumu kulturā, kod i sovā latgaļu volūdā i latgaļu tradicionalajā pasauļa varejumā …
Cik suopeigi ir dzierdeit i laseit, ka latgaļi ( nu jov daže poši sevi sauc par latgalīšīm voi Latgolys latvīšīm) vairuok naasūt ar sovpatū mentalitati i identitati, ka „latgalīšīm” naasūt sovys latgaļu volūdys, a viņ latgalīšu rokstu volūda. I tū aplīcynoj poši, zynuotņu gradīm nūtitulātī, multikulturaluos Latgolys pamatetnosa puorstuovi. Šūdīniejī latgalīši ( latgalīši var jov byut, nu, na latgaļi) asūt sovā uzvedeibā i roksturā taidi poši, kai vysi latvīši, kai vysi krīvi, kai vysi amerikaņi, kai vysi zvīdri, vuocīši voi igauņi, kur nu kotrys voi daudziejī, jī dzeivojūt.
Viņ pasaceļ vaicuojums par tīm latgaļīm, kuri dzeivoj storp latgaļīm …i kuru zeidīšs nav izamainiejīs, i kuri pīsatur pi soviejuo sirdī i dvieselē, i volūdā.
Dieļ tuo suopeigi, ka taidu gora miļzi – latgalīti, kai Pīters Miglinīks, kura ūtra naatrast ņi pi vīnys tautys, mes naiznasam pasauļa atpazeistomūs personaleju kolnā, kai multikulturaluos Latgolys izaukleitū varūni. I dieļ kuo mes nasalepojam ar sovu Francisku Varslavānu i nareikojam juo pīminis dīnys Parizē, kur jis lobu laiku uzaturieja? I dieļ kuo mes Eiropys mārūgā naatzeimojam Altmarkys pamīra godskuortys, kod Latgola nu Livonejis vuocīšu i Moskovejis krīvu vaidu, šausmu i laupeišonys vītys puorsavierte par multikulturaluos vidis šyupeli daudzumdaudziejuom tautuom, vīneigi – pošīm latgaļīm līdzūt byut multikulturalisma avangardā? Taišni piec Altmarkys pamīra, kod Latgola kļyva par Zeč Pospolitys vaļsts sastuovdali, Latgolu suoka apdzeivuot krīvi – vacticeibnīki, žydi, pūļi, lītuvīši …
Zeidīšs, zeidīšs. Šūdīniejī globalisma „dīvi” „zeižuos” nu politiski vīnvierzīnī angažeituo kulturšova uzstuodiejuma – par vysaidīm post – ( piec) , kas asūt vierteiguoks par tradicionalajīm, nacionali etniskajīm, naivi emocionalajīm, lai i pošuom tautuom ar sirdi i dvieseli pīnamamuokīm, tūtīs amerikaniskajai kulturai nadereigīm, jo nav naudys turātuoju atbaļsteiti.
Cik žāļ, ka i Latgolā gryb sovu viesturiskū zeidīši nūmaineit. A voi nu tuo poši latgaļi kū na viņ īgyvs? Itys aizdavums palīk naatklyuts.