Latgolys Radejis zinis (31.10.2007.)
Rēzeknis dūmis Sabīdriskū attīceibu nūdaļā apbolvuojumam “Rēzeknis Gūda pilsūns” pošlaik dasaceiti pīci kandidāti. Par Gūda pilsūņa nūsaukuma pīšķieršonu vysupyrma lems pošvaļdeibys Kultūrys, izgleiteibys, sporta, veseleibys, sociālū i dorba lītu komiteja, piečuok deputāti dūmis sēdē.
Valdeiba vakar pīšķeira 11 ministru kabineta atzineibys rokstus. Starp laureātim ir arī Jākubpiļa piļsātys dūmis prīkšsādātuojs Leonīds Salcevičs i Vīseitis pošvaļdeibys ar lauku teritoreju vadeituojs Jānis Dmitrijevs. Apbolvuojums pīšķierts par īguļdejumu pilsātu saimnīciskajā i sabīdriskajā dorbā.
Ludzys rajonā dzeivojūšim Daugavpils Universitātis studentim pīšķierta Ludzys rajona padūmis stipendeja iz sešim mienešim. Rajona pošvaļdeibys stipendeja 30 latu apmārā nu juļa da decembram pīšķierta DU Dobyszineibu i matemātikys fakultātis studeju programmys “Fizika” 2. kursa studentei Marinai Dubovskai i DU Izgleieiībys i vadeibys fakultātis, studeju programmys “Sporta školuotuojs” 2.kursa studentei Marinai Kruglovai.
Šudiņ i reit Daugavpils Universitātē nūteik Latvejis 5. Karjerys dīnys “Ideja – Iespēja – Risinājums“. Karjerys dīnu mierķs ir veiduot dorba formu starp aktīvū jaunatni i uzjāmumu puorstuovjim, atbalsteit Latvejis dorba deviejus aizvīn gryušuokajā darbinīku atlasis procesā i runuot par veiksmeigai integrācejai dorba tiergā vajadzeigū izgleiteibu i prasmem.
Nu reitdīnys da 3. novembram Daugavpils Muzykys vydusškolā nūtiks X Starptautiskais akordeona mūzikas festivāls. Festivālā daleibu jims akardionisti i akardionistu ansambļi nu Latvejis, Lītuvys, Boltkrīvejis, Krīvejis, Vuocejis i Holandis. Kai festivāla vāžnuokī gosti Daugavpils skateituojus prīcēs populārais duets nu Krīvejis “Bajan Mix”.
