Riezeknē suokas “Jaunatnis demokratejas nedeļa”
![](https://lpr.gov.lv/wp-content/uploads/2005/dezuratteli/79.jpg)
Nu šudines da 26.oktobram nūtiks “Jaunatnis demokratejas nedeļa Riezeknis dūmē”. Pasuokums teik organizāts ar mierķi veicinuot pylsātas jaunīšu leidzdaleibu sabīdriskajūs procesūs, radeit tīšu saikni storp Jaunīšu dūmis, školānu/studentu pošpuorvalžu puorstuovim i Riezeknis pylsātas dūmis vadeibu i nūdaļu specialistim.
Novembrī Preiļūs nūtiks SIA “Preiļu saimnieks” i VA “Mājokļu aģentūra” organizātuos vuiceibas nomu energopuorvaldnīkim.Kursu programma paradzāta 54 stunžu apjūmā. Pluonūts, ka pyrmuo nūdarbeiba nūtiks ituo goda 7.novembrī, sovukuort tuoļuokais vuiceibu grafiks tiks saskaņūts pyrmajā vuiceibu dīnā, jamūt vārā grupai izdeveiguokū laiku.Kursu pabeigšonas sertifikāts dūs īspieji dzeivūtuojim veikt sātu puorvaldeišonu, kai arī īspieji struoduot komunalū pakalpojumu sferā.
Itamā nedeļī školānu breivdīnuos Daugavpils, Kruoslavas, Preiļu, Riezeknis, Ludzas i Bolvu rajonā tiks reikūti treisdīnu bezmoksas seminari, kuramūs jaunīši papildinuos sovas zinuošonas par navalstiskajom organizacejom. Seminarūs jaunīši papildinuos sovys zinuošonas arī par pilsūnisku sabīdreibu, īsapazeis ar projektu raksteišonas pamotim, izzinuos vaira par Eiropas Savīneibas programmas “Jaunatne darbībā” pīduovuotajom īspiejom, naformalū izgleiteibu i breivpruoteigū dorbu.
Daugavpils rajona kulturas nomā 30.oktobrī nūtiks Latgolas reģiona myužizgleiteibas konference, kuramā tiks diskutiets par myužizgleiteibas atteisteibas politiku i atteisteibas tendencem Latvejā i Eiropā, par projekta “Latgales reģiona mūžizglītības atbalsta sistēmas veidošana un kapacitātes stiprināšana” rezultatim i cytim vaicuojumim.