Uzjiemieju dīnys Daugavpilī
![](https://lpr.gov.lv/wp-content/uploads/2005/dezuratteli/79.jpg)
Šudiņ Rēzeknis dūmis Finanšu i budžeta komitejis uorkuortys sēdē i Rēzeknis dūmis uorkuotys sēdē plānoj lemt par četru miljonu latu kredīta jimšonu Vaļsts kasē syltumapguodis problemu rysynuošonai. Bet aizvakar Rēzeknis dūmis deputātu sanuoksmē i tikšonuos laikā ar SIA “Latgales enerģija” puorstuovjim skateita izstruoduotuo piļsātys syltumapguodis atteisteibys strategija i sprīsts par izveiduojušūs situāceju syltumapguodis jūmā.
Šudiņ pustrejūs Daugavpilī, atpyutys i izklaidis centra “City Center” konferenču zālē suoksīs konference “Puorrūbežu sadarbeibys lūma uzjiemiejdarbeibys atteisteibā”. Konferencis daleibnīkim- uzjiemiejim nu Daugavpils i Zarasai- byus īspieja dybynuot lītišķus kontaktus i sajimt aktuālu informāceju par biznesa atteisteibys īspiejom Latvejā i Lītuvā naformālā gaisūtnē.
Rēzeknis nūvodu plānoj izveiduot divus mienešus pyrms kuortejom pošvaļdeibu vieliešonom 2009. godā. Rēzeknis nūvoda veiduošonys sapulcis dalinīki nūlēme lyugt pīšķiert mierķdotāceju apsavīnuošonuos projekta izstruodei. Par projekta sagatavošonu atbiļdeiguo pošvaļdeiba ir Gaigalovys pogosta padūme. Apsavīnuošonuos projekts tiks izstruoduots sešu mienešu laikā nu mierķdotāceju sajimšonys breiža.
Jākubpils pošvaļdeiba veiduos pastuoveigu komiseju, kurys uzdavumūs byus apzynuot situāceju piļsātā i eistynuot iz nalobū sociālū problemu – alkaholisma, narkomānejis i pusaudžu klaiņuošonys īrūbežuošonu – vārstus pasuokumus.
Šudiņ divūs Rēzeknis rajona padūmis zālē nūtiks 10.literāri muokslinīciskuo almanaha “Rēzekne 2007” prezentācejis pasuokums. Jau tradicionāli almanahā sovejū dzeju, dzeju prozā, eisūs stuostus i esejis publicej dažaidu paaudžu, vairuok i mozuok pazeistami ni tikai Rēzeknis piļsātys i rajona autori, bet arī Ludzys i Bolvu rajonu literāti. Itūgod almanahu veidoj 51 autora dorbi latvīšu, latgalīšu i krīvu volūduos.
Šudiņ Ludzys rajona Malnovā i Kuorsovā nūtiks grupys “Borowa MC” trešuo muzykys videoklipa fiļmiešona dzīsmai “Baba Toņa Inženers” nu grupys ūtruo studejis albuma “Plastalina pasaule”. Sižeta pamatā ir traktoru dragreiss – parodeja par myusdīnu jaunīšim, kas brauc ar “ bumerim”. Sižeta golvonuo varūņa lūma uzticāta “ babai Toņai”.