konkurss “PEGAZA RAGAVENIS”
Itys konkurss nūteik storptautiskuo seminara “Atzolys” laikā (nu ituos šaļts da 3. augusta vokora), tok jimt daleibu jimā var kotrys, kas var, muok i gryb īsnīgt sovu rodūšū dorbu konkursa žūrejai.
Gaideiti teik vysi, kas ir gotovi izturēt lelu konkureņci, sasaceņst ar lobuokajim sova omota meisterim i paruodeit sovu rodūšū goru nu lobuokuos pusis (na nu sātmaļa, a paruodis durovu pusis).
Dorbus syutit iz e-postu lgsc@inbox.lv voi sasazynojit ar Egitu par cytom pīguodis vareibom pa teleponu 26430230.
„Atzolu” rodūšuo konkursa „Pegaza ragavenis”
NŪLYKUMS
Atzeimojūt „Atzolu” četru godu jubileju, organizatori izsludynoj konkursu „Atzolu” dalinīkim, krystamuotem, krysttāvim, gostim i garomguojiejim „Pegaza ragavenis”.
Konkursa aizdavumi:
• veicynuot „Atzolu” dalinīku, gostu i garomguojieju interesi par Latgolu, latgalīšu volūdu, literaturu, folkloru, Latgolys geograpeju, ekonomiku i kulturviesturi, kai ari par Sibira i Latgolys saskarsmi,
• nūstyprynuot i fiksēt „Atzolu” rodūši namīreigū goru jaunūs i izteiksmeigūs radūšajūs dorbūs.
Konkursa organizatori:
seminara „Atzolys” organizatori
Konkursa dalinīki:
„Atzolu” dalinīki, krystamuotis, krysttāvi, gosti i garomguojieji
Konkursa laiks i vīta:
2007. goda 29. juļs – 2. augusts, Rogovka
Konkursa aizdavums:
izveiduot rodūšu dorbu par vīnu nu pīduovuotajom temom vīnā nu dūtajim formatim
Rodūšūs dorbu formati:
1. Rakstisks (esejai, stuostam, dūmrokstam, dzejai, dramai i tml. juobyut sagataveitai latgaliski, kū na varams puorskaitamuokā rūkrokstā ci datorrokstā, maksimalais apjūms – 10 A4 formata lopys);
2. Vizuals (zeimiejumu, plakatu, kolažu, obrozu i tml. maksimālais formats – A3 (obrozus dreikst apstruoduot ar grafiskūs programu paleidzeibu);
3. Audials (dzīšmu, svineigūs runu i tml. tekstim juobyut sagataveitim latgaliski i īraksteitim CD, DVD, audiokasetē ci videokasetē ci muokslinīkam juobyut pylnā gataveibā dorbu atskaņuot kluotīnē sevkurā žurejai napīcīšamā laikā, audiālūs dorbu garums nadreikst puorsnīgt 10 minotu);
4. Audiovizuals (audiovizualajom esejom, stuostim ci reportažom juobyut sagataveitim latgaliski, jūs garums nadreikst puorsnīgt 20 minotu).
Temys:
1. Muna Latgola
2. Vasals, latgalīt!
3. Es meiļoju Latgolu
4. Smejīs latgaliski!
5. Mes kūpā – Latgolā
6. Troks ci nu Rogovkys
7. Ka es byutu rogovkīts…
8. Zīd rūžys Rogovkā
9. Es pats – atzolīts
10. Vīna dīna „Atzoluos”
Konkursam īsnīgtūs dorbu vierteišonys kritereji:
1. Idejis atbiļsteiba temai i „Atzolu” rodūšajam goram,
2. Dorba struktura i nūformiejums,
3. Idejis originalitate.
Nūsaciejumi:
1. Dorbam obligati juopīvīnoj autora vuords, pavuorde i kontaktinformaceja – ustabenis nūsaukums;
2. Rodūšī dorbi (naatkareigi nu formata) nadreikst byut da tuo publiceiti ci īsnīgti kaidā cytā konkursā;
3. „Atzolu” organizatori ir tiesīgi publicēt konkursam īsnīgtūs dorbus.
Apbolvuošona:
eistyn ekskluzivys bolvys i „Atzolu” organizatoru apskuovīni i rūkys spīdīni 3. augustā
Kab Tova Pegaza ragavenis vysod byutu pylnys ar rodūšom dūmom!
Lai Tev labi lūbās!