Rāzna 2007 – Latgolys autorallijs

Šudiņ i reit Rēzeknis apkaimē nūsarysynuosīs leluokais ituo goda autosporta nūtykums Latgolā – rallijs “Rāzna 2007”, kuramā daleibu jims 44 ekipažys. 27 ekipažys veiks pylnu rallija distanci, bet 17 startēs mini-rallija īskaitē. Jau ziņuots, ka sacenseibys kandidej iz īkļaušonu Latvejis rallija čempionātā cytugod, deļ tam itūgod puļcēs gondreiž vysys spieceiguokuos Latvejis rallija ekipažys.

Šudiņ Daugavpilī nūtiks piļsātys atbreivuošonys nu vuocu fašistiskajim ībruciejim 63.godadīnys pasuokumi. Reita dasmytajā stuņdē Dubrovina parkā pi memoriala Ūtrajā pasaulis karā krytušajim Sorkonuos armejis karaveirim tiks nūlikti zīdi i nūtiks pīminis breids. Pusstuņdi vieļuok Daugavpiļs Bruoļu kopūs svineigai tiks puorapglobuotys Daugavpilī elektreibys stuburu mainis laikā iz piļsātys dambja atrostuos diveju Ūtrajā pasaulis karā krytušūs Sorkonuos armejis karaveiru miersteiguos atlīkys.

Šudiņ Dagdā turpynojās piļsātys statusa pīšķieršonys 15 godu jubilejis pasuokumi. Jau reita agrumā Dagdys azarā suocēs makškeriešonys sacenseibys. Piļsātys skvērā paradzāts omotnīceibys tierdzeņš, kai arī tautys muzykys koncerts, bet jaunajā pludmalē nūsarysynuos sporta pasuokumi. Sešūs Lubānys piļskolnā suoksīs vakariešona ar zivu zupys degustaceju i folklorys kūpys “Olūteni” uzastuošonuos.

Reit Bolvu maižys koncertzalā nūtiks VIII kamermuzykys festivals. Bolvēnīši i gosti varēs baudeit Leluos skatuvis muzykys muokslu. Itūgod divejuos dīnuos byus četri koncerti, kai ari vairuokys koncertlekcejis.

Nu šudiņdīnys da 29.juļam, Daugavpils lada hallē nūtiks hokeja turnirs “Daugavpils kauss”. Turnirā daleibu jam laukuma saiminīki – Daugavpils hokeja komanda “Latgale”, Kazahstanys izlasis bāzis komanda – Krīvejis augstuokuos leigys daleibneica “Kazzincs – Torpedo” (Ustjkaminogorska), Latvejis vicečempioni “ASK Ogre” i bronzys gūdolgu īgivieji “Līpuojis metalurgs”