Latgolys Radeja atzeimoj vīnu godu dzeivajā ēterā

Latgalīšu jaunuos muzykys „oaze” Latgolys Radeja atzeimoj vīnu godu dzeivajā ēterā.

Laikā, kod Daugovpiļs rajona Leiksnā trešū reizi teik īripynuots jaunuos latgalīšu muzykys festivals „Muzykys Skrytuļs”, sovu pyrmū godu dzeivajā ēterā atzeimoj latgalīšu muzykys oaze Latvejā – „Latgolys Radeja”.

„Latgolys Radeja” vysa goda garumā bejuse leluokais jaunuos latgalīšu muzykys popularizeišonys veicynuotuojs i jaunu dzīšmu radeišonys mudynuotuojs. Pyrmū reizi, gon veļ testa režimā, radeja izskanēja 2006. goda 9. junī 16:30 stuņdēs Rēzeknis frekvencē, a dzeivajā ēterā radeja regionu sveice pyrma goda – 11. julī. Latvīšu jaunajom grupom i muzykantim tyka dūta vareiba paruodeit i pīruodeit sevi, deļtuo ka „Latgolys Radeja” ir demokratiska i mierktīceigai atbolsta ari „jaunūs” ceņtīņus.

Radejis pamatrotacejā kasdīnys skaņ lobuokuos latgalīšu, latvīšu i uorvaļstu muzykantu kompozicejis, tok vysleidza juos vysu leluokais īguļdiejums ir vītejuos muzykys atteisteiba. Pasasokūt regionalajai radejai, goda laikā vītejuos grupys i izpiļdeituoji palykuši populari i plaši pazeistami kai Lotgolā, tai uorpus juos. Sevkurs radejis klauseituojs pazeist taidys Latvejis mārūgā sevi daruodejušuos grupys kai „Bez PVN”, „Dabasu Durovys”, „Laimas Muzykanti” i „Borowa MC”, taipat ari jaunūs vuordus – Weron Martin, Juri Ostrovski, grupys „Rudiņs Steigys”, „Sindroms”, „Green Novice” i lelu popularitati īgivušū „Likteneigīs pagrīzīņs iz Vainovu”.

Goda garumā sevi daruodejušys ari „Latgolys Radejis” muzykaluos programys. „Latgolys Radejis Top 20” kotru nedeli pyrmūdīnēs teik apkūpuotys popularuokuos i klauseituoju īmeiluotuokuos latvīšu, latgalīšu i uorvalstu muokslinīku dzīsmis, kas dūd leidzvierteigu danasumu ari kūpejā Latvejis muzykys topā. Laidīnī „Pyune” vareiba izapaust teik dūta vysim interesentim – muzykys amatīrim. Pasasokūt tam, radejis ēters palics veļ interesantuoks. Sovu vītu programā atrodušys laidīņa „Skaņu sāta” intervejis ar cylvākim, kas saisteiti ar muzyku, i laidīņa „Rokmuzykys legendys” stuosti par pasauļa rokmuzykys legendom. Veiksmeiga sadarbeiba izaveiduojuse ari ar latvīšu popularuokajim muzykantim i grupom – kotru sastdīni teleponintervejuos teik dazynuotys jūs dzeivis aktualitatis i klauseituojim ir vareiba īgiut pošu muzykantu saruypātuos bolvys. Interesantus stuostus par pasauļa muzyku klauseituoji dzierd laidīnī „Spaiti”. Latgola nav īdūmojama bez tradicionaluos muzykys, deļtuo kasnedelis laidīnī „Aizīsim iz Večerinku” klauseituojim ir vareiba atguoduot ci dazynuot, kai ļauds Latgolā ļustēja pyrma daudzi godu. Itū laidīni Nacionaluo radejis i televizejis padūme ir atzynuse par lobuokū regionalajuos radeju stacejuos.

„Latgolys Radejis” pīmārs veiksmeigai daruoda taišni regionalūs medeju nūzeimi vītejuos kulturys, konkretuok jaunuos muzykys atteisteibys veicynuošonā i popularizeišonā, juos kvalitatis pylnveiduošonā – dūdut īguldiejumu kai pošā regionā, tai leidza ar tū ari vaļstiskā mārūgā.

Atzeimojūt goda jubileju, radeja nūvielej: „Dzeivoj ļusteigi ar Latgolys Radeju!”

Informacejai: „Latgolys Radeja”
Daugovpiļs 95,2 FM,
Jākubpiļs 95,8 FM,
Rēzikne 103 FM,
www.lr.lv