Muoksla ci vandalismys?

Myusdīnu grafiti kai daļa nu hip-hopa kulturys ir radīs Ņujorkā i mierķtīceigai izaplatejs vysā pasaulē, tūstorp arei Latvejā. Zeimiejumus iz sīnom var atrast gondreiž kotrā piļsātā, arei Latgolys sirdī – Rēzeknē – itaidu muokslys dorbu nav mozums. Verūtīs iz itim dorbim ci nadorbim, saucit kai lobuok pateik , rūnās vaicuojums: muoksla ci vandalismys.

Nu Ņujorkys da Rēzeknei

Myusdīnuos grafiti kai hip-hopa kultūrys daļai ir sovys školys, stili, lykumi i tīseibys. Grafiti „izejūt uorpus” Ņujorkys rūbežom sasajaucēs i saplyuda ar dažaidim stilim, taidejaidai pamozom palīkuot vairuok ci mozuok par vandalisma izpausmi navys par muokslu. Itaidys muokslinīciskuos izpausmis Latvejā teik uzskateitys par vandālisma izpausmi i teik administrativi struopātys.

Grafiti ir cīši izplateits Reigā i na tikai kai „aizlīgtuo muoksla”, bet arei kai naatjamama kaidu konkursu i pasuokumu sastuovdaļa, pīmāram, pārn Reigā “Jaunūšu mieneša” laikā nūtyka pirmais Baltejis graffiti čempionāts, grafiti muokslinīki Reigā ni tikai sasacente talanta i prasmes izruodeišonā, bet arei individuālys idejis paušonā. Itimā ziņā juoizsoka tikai apbreina par Daugavpils dūmis atjauteibu – jaunīšim lobuok atļaut apzeimēt skeid-parka sīnys i rampys nakai tys nūtiks paslepus, tod, kod parks byus slāgts.

Ikai tod ir ar Rēzekni? Rēzeknē gondreiž nav nivīnys ākys ci byuvis kur nabyutum koč vysmozuokuo mozuo hligana autograpa. Bez prostim parokstim piļsātā ir sastūpami arei grafiti zeimiejumi i navar nūlīgt muoksla tī ir!

Nūvāruovu, ka Rēzeknē kruosu baloneņus pa labi i pa kreisi vycinoj grafity muokslinīks ar pseidonīmu Voļix drupeit mozuok naz kaids Caster i Hawk. Munai namuokslinīciskajai acei daža pasaruodie, ka muokslinīkam Voļix nav vēļ izaveiduojs sovs zeimiešonys stils, nav izakristaliziejus vīnuota dūma, jū aiz juo autograpa stuov gon cīš lela kruosaineiba, gon prostai izpyusti vuordi, gon grafiti šedevri, pi beidzamajim nanūlīdzamai pīder naktskluba „Maroco” fasādis sīna. Bet Voļixa repertuārā sasavīnojās arei biernišķeiga „PUZZLE” ar nasaprūtamu uzrokstu „VX”.

Kai tūp muksla?

Kleistūt pa krāslainojom Rēzeknis īlom maņ beja tei laime (ci nalaime?) byut par līcineicu kai tūp grafiti, juotazeist, ka es iļgi tiemeiju prūvejūt izprast i golvonais saprast, kas tur raksteits, i naz deļ kam itaidus zeimiejamus godās, ka tiemejom vaira nakai pošu Monu Lizu.

Struope ci uzslova?

Ībrīnūt lykumu pasaulī – grafiti nav nikaida muoksla, bet gon mozeņkais vandalismys. Ja jaunū muokslinīku juo darbeibys muokslinīcikajā izpausmē pīgius kuorteibys sorgs, tod jaunais muokslinīks pavysam namonomai zaudej sovu statusu i palīk par prostu huliganu, kuram leidza valkās pants par sabīdriskuo eipašuma būjuošonu. Lykumsorga acēs grafiti teik nūvārtāts kai bezjiedzeiga nūdarbe, kas struopejama.

Kai atsatīc pret grafiti?

Kab uzzinuotum kū pa itaidu muokslu soka poši riezeknīši, apvaicuoju 20 dažaida vacuma i dzimuma īdzeivuotuojus. 6 cylvāki (jaunīši i videjuos paaudzis cylvāki) kategoriski paziņova, ka itys ir huliganismys i normālā sabīdreibā tys nav pījamams. Tūmār leluokuo daļa (14) uzskota, ka grafiti ir smukai, ka itaidā veidā teik atdzeivinuoti vacī, nūlukušī škiuneiši i garāžys, bet grafiti pīļaunams vīņ tod, ja nivīnam namaisa. . Deļ visim apvaicuotajim napījamami i daža amorālai ruodejuos zeimiejumi iz gaišom āku sīnom, jū piec īdzeivuotuoju dūmom tur vairs nasakreit stili i vīnkuorši būjoj vysu skotu.

I otkon atsagrīžu pi vaicuojuma – vandalismys ci muoksla? Tīšu, vīnnūzeimeigu i napuorprūtamu atbildi snīgt nav īspiejams, jū grafiti taipat kai da šam mātuosīs starp jiedzīņim moksla i huligānisms. Nu vīnys pusis – tys ir puorkuopums, par kurū pīsanuok struope , bet nu ūtrys pusis itī zeimiejumi arei teik uztvarti kai muoksla, paradokss. Ja kaidam grafiti ir saisteits ar idejis izpausmi, tod problema ir vaicojama jaunīšu pašizpausmē i pošrealizācejā, i tod itys vaicuojums vaira nav myusu ziņā, bet gon „drupeit augšuok”.

Autoris foto.