Latgolā dzymuša muokslinīka glazna 72,8 milj. ASV dolaru vierteibā

Daugavpilī dzymušuo glaznuotuoja Marka Rotko glazna Sousebais izsūlē puordūta par rekordlelu summu – 72,8 miljonim ASV dolaru. Tei klivuse par duorguokū myusdīnu muokslys dorbu, kas puordūta izsūlē. Glazna “White Center: Yellow, Pink, Lavender on Rose” piyrma izsūlis nūviertāta kaidu 40 miljonu dolaru vierteibā. Glaznys pierciejs gribiejs palikt anonims. Pyrma izsūlis glazna kūpš 1960.goda atsaroda Ņujorkas filantropista Deivida Rokfellera sovumā.

Leivuonu nūvoda dūme pījāmuse lāmumu šudiņdīnu 16. maju, pošvaļdeibā pasludynuot par sāru dīnu, kab pīminātu 14.majā tragiskajā autoavarejā iz ceļa Reiga- Daugavpiļs būjā guojušus četrus Leivuonu īdzeivuotuojus. Šudiņ leivnīši lyugti izkuort karūgus sāru nūformejumā.

Šudiņ pl.15:00 Rēzeknis piļsātys dūmē nūtiks tradicionalais pasuokums “Veiksminīks 2007”, kuramā sveiks piļsātys izgleiteibys īstuožu školānus, vaļsts i nūvoda vuiceibu prīkšmetu olimpiažu, 31. Latvejis zynuotniskuos konferencis, vaļsts mārūga sporta sacenseibu īveiciejus i jūs pedagogus. Itūgod pošvaļdeibys bolva par īguldeitū dorbu i sasnīgtū rezultatu tiks pīšķierta 27 školānim i 22 pedagogim.

Šudin pl.17:00 Daugavpilī, Latgolys Centralajā bibliotekā, nūtiks franču literaturas vokors “Franču – latvīšu dzejis tylts”, Vokora gaitā Daugavpiļs universitatis gostlektore Elizabete Marsa snīgs īskotu 18.-20.godsymta franču dzejā. Daugavpiļs Universitatis franču volūdys studenti skaiteis franču klasiķu, ari Bodlēra, Verlēna i Eliāra, dorbus, kai ari Daugavpiļs Universitatis Svešvolūdu centra franču volūdys pasnīdziejs Romāns Savickis kūpā ar studentim prezenties sovu franču volūdā izdūtū dzejūļu kruojumu “Dzejūli ar klaidom”.

Laika prognozs šudinei Latgolā. Muokūņains laiks, šaļtim skaidruosīs. Eislaiceigs leits. Dīnvidrītumu viejs 2-5 metri sekuņdī, maksimaluo gaisa temperatura dīnā +13 +16.