DU gatavejās jaunajam rektoram

Daugavpiļs Universitatis rektora omotam pīzateikuš diveji pretendenti: Unversitatis rektora vieliešonas nūtiks 6.junī. Tymuos pīzadaleis Daugavpiļs Universitatis zynuotņu prorektors profesors Arvīds Barševskis i Izgleiteibys i vadeibys fakultatis dekane profesore Ilga Salīte.

Šudiņ vokorā izsūļu noms “Sotheby’s” Ņujorkā izsūleis divejus Daugavpilī dzymušuo muokslinīka Marka Rotko dorbus. Izsūlē tiks pīduovuota muokslinīka glazna “White Center (Yellow, Pink and Lavender on Rose)”.Teik prognozāts, ka itys dorbs tiks puordūts par apmārom 30 miljonim ASV dolāru (15,5 miljonim latu). Izsūlē tiks puordūts arī Rotko dorbs bez nūsaukuma, kuram “Sotheby’s” prognozej 1,5 leidz 2 miljonu ASV dolāru (780 tyukstušys leidz miljona latu) cenu.

Pīkdiņ Rēzeknis dūmis uorkuortys sēdē deputati pīškiera finansiejumu 5 tyukstušys latu apmārā Latgolys Kulturviesturis muzejā paradzātajai keramikys pastuoveiguos ekspozicejis atjaunuošonys pyrmajai kuortai. Latgolys Kulturviesturis muzeja ākys ūtrajā stuovā paradzāts septeņūs zalūs īkuortuot atjaunuotū keramikys ekspoziceju, kurā ir ap 2 tyukstušom keramikys kolekcejis prīkšmetu. Latvejā itei ir vīneiguo pastuoveiguo keramikys ekspoziceja.

Šudiņ Preiļūs īsarass Taipejis misejis Latvejā puorstuovji – misejis vadeituojs Andijs Čins (Andy Chin), misejis ūtrais sekretars Šiu-min Ju (Shiuh-min Yu) i misejis vadeituoja paleidze Marita Saveļjeva. Plkst. 12:00 paradzāta tikšonuos Preiļu nūvoda dūmē, kurys laikā tiks apsprīsti sabīdreibys vaicuojumi kulturys, izgleiteibys i uzjiemiejdarbeibys jūmā, piečuok Preiļu golvonuos biblotekys Bārnu literaturys nūdaļā svineigai tiks atkluota Taivānys bārnu zeimiejumu izstuode.

Rēzeknis dūmis uorkuortys siedī apstyprynuots piļsātys logotips, kuru piec grafiskuo standarta izstruodis izmontuos piļsātys dūmis veidlopu nūformiešonā, prezentacejas prīkšmetūs i piļsātys interneta sātyslopā. Logotips plašuokai publikai vēļ tiks prezentāts. Riēzeknei jau īprīšk apstyprynuots sauklis: “Rēzekne. Piļsāta Latgolys sirdī”, iz kuru pamatuojūtīs veidūts logotips.

Šudiņ pl.10:00 nūtiks pījimšona pi Rēzeknis rajona padūmis prīkšsiedietuoja Monvida Švarca par gūdu školānim, kuri puorstuoviejuš Rēzeknis rajonu vaļsts olimpiadēs i školānu zynuotnis pietnīciskū dorbu konferencēs. Tiks pasnīgtys bolvys i atzineibys roksti školānim i jūs školuotuojim.

Ludzys piļsātys dūmis deputati pījēme lāmumu pylnvaruot Ludzys pošvaļdeibys policeju kontrolēt transportleidzekļu apsastuošonuos i stuoviešonys nūsacejumu īvāruošonu Ludzā. Pylnvaruoti – Ludzys pošvaļdeibys policejis prīkšnīks i Ludzys pošvaļdeibys policejis policisti.

Šudiņ Daugavpilī suoksīs i reit turpinuosīs Jaunatnis dīnu pasuokumi. Šudiņ programmā paradzāta mūdis skate, sportistu paraugdemonstriejumi, vairuokys cytys izdareibys. Bet reitdīna byus veļteita muzykai. Vīneibys laukumā trejūs suoksīs i leidz pat devenim turpinuosīs dažaidi koncerti.