Reigā byus regionu izstuode
Itūnedeļ, 10. i 11. maijā, starptautiskajā izstuožu centrā Kīpsolā, pošvaldeibu izstuodē-forumā “Regioni – Latvejis atteisteiba. Vīzejis. Īspiejis. Rysynuojumi” ar prezentacejom uzastuos ari Leivuonu nūvoda dūmis i Latgolys planuošonys regiona atteisteibys padūmis prīkšsādātuojs Andris Vaivods. Foruma pyrmajā dīnā Andris Vaivods uzastuosīs sesejā “Inovativuos uzjiemeijdarbeibys īspiejis regionūs” ar prezentaceju par Leivuonu inženertehnologeju i inovaceju centra izveidi. Foruma ūtrajā dīnā Leivuonu pošvaļdeibys vadeituojs daleisīs nūvoda izveidis pīredzē.Šudiņ i reit Rēzeknis dūmis i uzjiemieju oficialuo delegaceja pīredzis apmainis nūlyukā gastej Moskovys zīmeļaustrumu apgobola Lianozovys rajonā. Vizitis laikā riezeknīši īsapazeis ar kulturys īstuodis “Lianozovys kulturys i atpyutys parks” dorbu i kulturys projektu realizaceju. Vēļ paradzāts izzynuot privatuo kapitala pīsaistis kulturys i starpkulturu atteisteibai.
Rēzeknis dūmis Infrastrukturys i atteisteibys komitejis sēdē šudiņ, ūtrajā konkursa kuortā izvērtēs vīnu dūmis izpilddirektora pretendentu. Rēzeknis dūmis izsludynuotajā atkuortuotajā konkursā dūmis izpilddirektora omota vītai pīsasacejuš beja seši pretendenti. Nu tim Infrastrukturys i atteisteibys komiteja ūtrajai kuortai izvirzeja vīnu kandidatu. Puorejī pīci nav bejuši pīmāruoti.
Daugavpils tramvaju uzjāmums īceriejs nūmaineit tramvaju vagonu nūvacuojušū ritūšū sastuovu. Uzjāmuma reiceibā iz itū breidi ir 53 tramvaja vagoni, kuru videjais vacums ir vairuok kai 20 godi. Daži tramvaja vagoni, kuru ekspluatacejis laiks ir 18 godi, Daugavpilī teik lītuoti jau 28 godus.
Par pārnuos zuolis dadzynuošonu šudiņ Rēzeknis tīsā tiemēs divejis administrativuos lītys, bet reit – vīnu. Tīsa ari nūsaceis izskateišonys laiku divejom puorcaltajom tīsys sēdem, kuramuos apsyudzātī nabie īsaroduš. Kūlys dadzynuotuojim uzruodeita apsyudzeiba, kurā par nūdarejumu parzadzāta naudys struope fiziskajom personom nu 200 leidz 500 latim ci administrativais arests leidz 15 dīnnaktim.
Šudiņ Jākupilī īsarass Latvejis Nacionaluos operys puorstuovji, kab apsavārtu i nūvārtātu asūšuos īspiejis izruodis nūdrūšinuošonā Krustpiļs salenis estrādē, kur vosorys suokumā plānuota Latvejis Nacionaluos operys izruode Džakomo Pučini „Turandota”.
