Pūdnīku dīnys turpynojās

Šudin Rēzeknis rajonā turpynuosīs tradicionaluos Latgolys pūdnīku dīnys. Šudiņ byus radūšuos darbneicys bārnim “Mūdis darbneica”, “Susātivu teatrs” i “Body Art” darbneica Viļānu Muzykys i muokslys školā. Vīnpadsmitūs byus ari atvārtūs durovu dīna i bārnu radūšū dorbu apskate Jura Soikāna Ludzys muokslys školys Nautrānu nūdaļā. Sovukuort piecpušdinē Latgolys Kulturviesturis muzejā byus Lītovys muokslinīku dorbu izstuode “Pūdnīceiba cytuos muoksluos”.

Nu šudines da 29.apreļam Daugavpilī nūtiks 10. starptautiskais džeza festivals “Jazz joy spring”. Šudin, reit i pareit nūtiks festivala koncerti, kuramūs pīsadaleis gon daugavpilīšim jau pazeistami, gon arī pilneigai jauni džeza mūziki i kolektivi nu Lītovys, Vuocejis, Krīvejis, Japanys, Pūlejis, Zvīdrejis i ASV. Latveju itamā pasuokumā puorstuovēs perkusionistu grupa “Afro ambient”, Siguldys big-bends, kai ari cytys grupys. 28.aprelī festivala koncertā uzastuos arī grupa “Grand Six” nu Francejis. Jubilejis festivals nūzasliegs ar Giordano džeza dzigu kompanejis izruodi Daugavpiļs teatrī.

Rēzeknē šudin 16:30 Informacejas tehnologeju centrā studenti tiksīs ar pūļu izcelsmis Vuocejis jaunuos paaudzis rakstnīku Arturu Bekeru. Sovuos gruomotuos jis roksta par emigrantu dzeivi Vuocejā. Rēzeknis augstškolā nūtiks gruomotys “”Šopēna sirds” skaitejumi, kai ari rakstnīks runuos par Vuocejis i Eiropys Savīneibys aktualitatem.

I laika prognozs šudinei Latgolā: daleji muokūņains laiks. Nūkrišni nav gaidomi. Nu reita dažūs rajonūs mygla ar radzameibu 500 – 1000 metru. Dīnvidrītumu viejš 2-6 metri sekuņdī. Maksimaluo gaisa temperatura dīnā +16..+19.