Veiduos Viļakys nūvodu
![](https://lpr.gov.lv/wp-content/uploads/2005/dezuratteli/79.jpg)
Paguojušajā svātdinē, piec svineiguo dīvkolpuojuma Krustpiļs katuoļu bazneicā, draudzis prīsters Viktors Naglis pasnīdze Pāvesta Benedikta XVI pateiceibys vairuokim cilvākim, kuri paleidzeijuš tapt Krustpiļs katūļu bazneicai. Prīsters Viktors Naglis Vatikana pergamentus jeb svieteibys svineigai pasnīdze Juoņam Kikustam, Leonidam Salcevičam, Janinai Saldakai, Maijai Kīnei, Kasparam Vaišlim, Uldim Helmutam Putniņam, Andrejam Naglim, Emeritai Naglei, kai ari Krustpils katuoļu bazneicys draudzei.
Šudiņ Rēzeknis tīsā paradzāts skateit ūtrū nu septeņom administrativojom lītom par kūlys dadzynuošonu. Kūlys dadzynuotuojim uzruodeita apsyudzeiba piec 179.panta 4.daļys, kuramā par kūlys dadzynuošonu paradzāta naudys struope fiziskajom personom nu 200 da 500 latim voi ari administrativais arests da 15 dīnnaktim. Īprīšk jau ziņuojom, ka par kūlys dadzynuošonu Rēzeknis rajonā administrativi struopātuo babeņa jau izcītuse struopi i pavadejuse divejis dīnnakts policejis izolatorā.
Rēzeknis sliminīeicā tryukst uorstu i itamā šāļtī breivys 33 dorba slūdzis. Dorbam teik pīaicinuoti uorsti nu blokus rajonim, pīvadumam, nu Preilim i Madūnys iz dežuru brauc anesteziologi, nu Bolvim – ginekologs, bet nu Ludzys – bārnu uorsts. Slimineicys golvonais uorsts Jezups Korsaks pastuosteja, ka itamā šaļtī tryukst 17 uorstu. Mediki kotrs struoduoj vairuok nakai vīnu slūdzi. Bīžai vin breivdīnuos jī teik izsaukti nu sātys iz kaidu steidzamu dorbu slimineicā. Vajdzeigs okulists, neirokirurgs, funkcionaluos diagnostikys uorsts, spaitu diagnostikys uorsts, fizioterapeits, stomatologs sejis i žūkļa kirurgejai, kai ari cyti.
Rēzeknē īsarūnās Vidis ministrejis specialisti, lai tiktūs ar SIA “Austrumlatgolys atkrytumu apsaimnīkuošonys bīdreiba” puorstuovim, kab puorrunuotu jaunuo atkrytumu poligona turpmuokū atteisteibu.
Šudiņ i reit Kruoslovys rajona kulturys darbinīki pīredzis apmaiņys braucīnī apmeklēs Valku. Valkā Kruoslovys rajona kulturys darbinīki jims daleibu seminarā “Valkys rajona i Valgys kulturvide. Rysynuojumi”, kuramā kūpā ar kolegom apsprīs profesionaluos muokslys pīejameibys īspiejis Latvejis regionūs. Seminarā planuots apsprīst biblioteku akreditacejis aktualitatis, kulturys montuojuma saglobuošonys i popularizacejis napīcīšameibu, kulturys procesu vadeibu, kai ari īpasazeisīs ar Igaunejis kulturpolitiku.