Internets gryb savīnuot Īreji ar Balteji
![](https://lpr.gov.lv/wp-content/uploads/2005/dezuratteli/79.jpg)
Tiks pīduovuotys jaunuokuos zinis nu Latvejis i Īrejis, informaceja par aktualitatem Latvejis viestnīceibā Dublinā, Latvīšu apvīneibā i Latvīšu bīdreibā Īrejā.Kai ari portalā tiks pīduovuota informaceja par lykumim, dorba īspiejom, atpyutu i izklaidis īspiejom.
Itunedeļ Vidis ministrejā nūslāgti diveji byuvdorbu leigumi par Daugavpiļs iudiņsapguodis, kanalizacejas teiklu i nūtakiudiņa sistemu rekonstrukceju, kuramā īguļdeis 15,5 miljonus latu.
Leigumi ir daļa nu Eiropys Savīneibys Kohezejis fonda leidzfinansietuo projekta “Iudiņssaimnīceibys atteisteiba Daugavpilī, ūtruo kuorta”. Nu Eiropys Savīneibys leidzeklim tiks sagti 85% nu projekta izmaksom. Byuvdorbus planuots pabeigt da 2009.goda juļam.
Pyrmudiņ Preiļu piļsātys centrā i Raiņa bulvarī, kurs ar nalelim īrūbežuojumim ir atvālāts guojiejim, tyka uzstuodeiti Leldiņu rūtuojumi – simboliski kūka veiduojumi ar stilizātom pučem, Leldīņu ūlom i plaukstūšim kūku zorim. Dūme aicinuojuse ari īstuožu vadeituojus sakūpt i izrūtuot sovu uzjāmumu ustobys par gūdu pavasara i gaismys svātkim – Leldiņom.
Nu 16.apreļa slīžu remontdorbu laikā dzelzceļa pūsmā Vabaļa-Leiksna maineits vilcīņu kusteibys grafiks.
Remontdorbu laikā nakursies dīzeļvilcīņs Reiga-Daugavpiļs ar atīšonys laiku pl.13:00, kai ari Daugavpiļs-Reiga ar atīšonys laiku 13:07. 20. i 27.aprelī Leiksnys stacejā tiks veikta puormeju nūmaiņa, deļ tuo itamuos dīnuos byus atcalti dīzeļvilcīni Daugavpiļs-Reiga ar atīšonys laiku 13:07 i Reiga-Daugavpiļs ar atīšonys laiku 7:05.
Šudin kristeigais pasauļs sviņ Zaļū caturtdīni, kuramā ticeigī pīmiņ beidzamuos Jezus Krystus vakarinis ar muoceklim – Svātuo vokoriedīņa īdybynuošonu. Par Lelū ci Klusū nedeli sauktuo nedeļa, kas simbolizej Jezus dzeivis beidzamū nedeļu, aizsuokusīs ar Pyupulu jeb Palmu svātdini. Itei ir arī beidzamuo gavieņa nedeļa. Iz kristeiguo pasauļa ar Zaļuos caturtdīnis dīvkolpuojumim teik īvadeitys Leldines – treis dīnas, kuramuos kristīši eipaši pīmiņ Krystus nuovi i augšamceļšonūs.
Šudiņ nu reita Rēzeknē Jezus sirds katedralī veiskups Juoņs Buļs voda eļļu svieteišonys svātū misi. Dīvkolpuojumā katedralē pīsadola Rēzeknis -Aglyunys diacezis prīsteri i diakoni. Kūpā ar veiskupu svātū misi celebrēs 30-40 garedznīki.
Laika prognozs šudiņei Latgolā:
Dalieji muokūņains laiks. Dīnā nadaudz eislaiceigi leis.
Dīnvidrītumu – rītumu viejš 6-10 m/s, dīnā brāzmuos 14 m/s.
maksimaluo gaisa temperatura dīnā +5…+7°.