Kroļs, krale i sikapisti
(sepiniejums)Nazynom, kas ir, tys ir, mes sovys tautys seņviesturis. Ņivīns tuos nav pīrakstiejs, tai poš, kai ņivīns tuos nav pruoviejs izceļt nu aizlaikūs bejūšajīm nūtykumīm i nanytykumīm myusu tautenis dzeivisvītuos.
Namyusu vaļdeituoju, namyusu kronistu, namyusu raksteitpratieju seņviesturis pīlīceibys mes šūdīņ uzturam par sovu viesturi. Golā – vysi, kam nav slynkuma, spļaun myusu dvieselei acīs i boksta ar atnadžainīm pierstīm myusu mīseigajuos acīs.
Nuj, mes pat nazynom, kai tauta sauce sovus karaļus i karalīnis. Lai goņ, ka zynom, ka pastuovieja Veče, to vaļdinīks beja juosauc par Večeli …
Mes puorsoku i viesturis gruomotuos losom par kieneņīm, karaļīm, labi zynūt, ka tī ir cyttautu dūtī nūsaukumi sovīm vaļdinīkīm, kuri pīleidzynuoti it kai myusu tautenis „kungīm”.
Prosuos – dieļ kuo pi Rēzeknis – pi Bombišku piļskolna ir taids izplateits pavuords, kurs izapladiejīs pa vysu Latveju – Kroļs? Prosuos – dieļ kuo Zīmeļlatgolā vieļ 20. gs. īsuokūs ploši pīlītova apzeimiejumu skaisti sagārbtuom sīvītiem – krale?
Voi tei nav nūruode iz myusu seņseniejīm vaļdinīku piectečīm?
Nuj, nav, kas ir, tys ir, myusīm eistu vaļdinīku pīminis, kuri nu paaudzis iz paaudzi nastu myusūs pošviertumu i mozyskuma īneisšonu vysūs šaislaiku ļauteņūs.
A taidu, kas ar liškeibuom, kas ar klaneišonūs i kuoju sumynuošonu, kas ar nūdeveibuom dativej varys krāslus i pruovej poši tymūs īsasiest, lai tūlaik vaļdeitu ar capuri, a na ar golvu, ar uzplečīm, a na ar placīm, ar pavieleišonu, a na ar uzklauseišonu, taidu ir puorpuoriem gona daudzi.
Nuj, sikapistu ir pylna myusu tauta, tai poš kai siebriejīm. I vysi kicinej ap sovīm vaļdinīkīm. I vysi vīnā bolsā nūtūkoj tūs gudrūs, kuri plykuom golvuom, keilīm placīm, nu patīseibys mutiem nymtīm vuordīm nūsastuojuos sovys tautys prīškā. Sikapistīm patīseiba nava vajadzeiga. Tei, kai ogruok, tai i tādiņ, apgryutynoj progoreibys „idealīm” tikt pi varys.
Večeļs, kroļs voi sikapists … Cik gryuši atškiert tūs, kod nazyni, voi naļaun zynuot tev tū patīseibu – par sovu tauteni, kas bejuse ir varūneiga goņ … Viņ varūņi ir traucieklis dieļ sikapistu puorvaļdis i varūņlaiku pīmine teik apsmīta, kai naatbiļsteiga dieļ šūdīnis.
A – voi? Mes byutu nu varūneigu vaļdinīku ciļts, to byutu myusu Abrene i Reiga, to byutu myusu zemeite i jyura, a, na kai tādiņ, puorpalykums puori nu cytu izprīcgolda.
Sadarbeibā ar Republika.lv
